A principios do mes de agosto o Conservas Orbe Rubensa Porriño arrancou a pretempada cunha combinación de xogadoras renovadas, caras novas e xogadoras do filial.
O adestrador, Isma Martínez, asegurou que “a xente chegou moi ben, estamos moi contentos e con moitas ganas e ilusión. A xente nova véxoa con moita fame, e a que continúa con moitísima ilusión da tempada que vén”. Son aínda baixa Inés Hernández e Fátima Ayelén.
A cara nova: Haridian Rodríguez
A principal novidade do plantel do Porriño é Haridian Rodríguez, a primeira incorporación anunciada polo club. A xogadora, de 34 anos, chega procedente do Rocasa Gran Canaria e conta cunha ampla experiencia e palmarés.
“Vexo un proxecto moi ambicioso”, asegura a nova xogadora do equipo galego. “Sempre quixen probar experiencias novas, aportar sempre ao club onde estea cousas novas e ao adestrador todo o que me esixa”, apuntou.
Haridian Rodríguez: “Sempre quixen probar experiencias novas, aportar sempre ao club onde estea cousas novas e ao adestrador todo o que me esixa”
A meta de Haridian Rodríguez co Porriño é a de “poder clasificarnos para Europa e para a Copa da Raíña, pelexar por títulos, porque creo que se poden pelexar. Por suposto, dar a mellor versión de min para aportar ao grupo e conseguir todo o que se poida”. A xogadora engadiu que “a verdade é que necesitaba un cambio e Porriño pódeme dar o que preciso”.
A valoración de Isma Martínez
Pola súa banda, o seu novo técnico, Isma Martínez, explica que esta incorporación “dános un salto competitivo grande, porque é unha xogadora hipercompetitiva e con moitísima experiencia na Liga. É un pouco o espírito que cremos que facía falta no grupo para dar ese pasito que todos queremos dar”.
O preparador salientou a súa experiencia, subliñando que “ao final é unha xogadora que gañou moitísimas cousas: Liga, Copas da Raíña e incluso competicións europeas”.
Nesta liña, Martínez valora positivamente a súa veteranía, esperando que “sirva de reflexo ás nosas xogadoras xoves. Para un club de canteira, como é o noso, ter un referente como ela é algo moi positivo”.
Isma Martínez: “Para un club de canteira, como é o noso, ter un referente como ela é algo moi positivo”
“Creo que nos vai aportar moitísimo, tanto en ataque como en defensa e entendemos uqe ten que ser unha xogadora fundamental para o grupo”, resume o adestrador do Porriño.
Sobre o xogo, o técnico a define como “unha xogadora moi intensa e moi boa defensora. En ataque, para min, é unha das xogadoras máis completas da Liga porque domina case todos os rexistros ofensivos”.
As renovacións
Haridian Rodríguez únese a un grupo de 18 xogadoras renovadas, que xa defenderon a camiseta do Porriño con anterioridade. Tras o anuncio da renovación de Estela Carrera en redes sociais, a propia xogadora declarou o sentir común: “Outro ano máis xuntxs e moi feliz”.
- Fátima Ayelén
- Estela Carrera
- Arima López
- Sandra Fernández
- Érica Tavares
- Anthia Espiñeira
- Sarai Samartin
- Inés Hernández
- Andrea Amarilla
- Claudia Kaulback
- Alicia Campo
- Aitana Santomé
- Begoña Otero
- Carme Castro
- Marta Da Silva
- Anastasija Doder
- Laura Magdaleno
- Ithaisa Trigo
O obxectivo: estar entre os oito primeiros
De cara a vindeira tempada, os obxectivos do Porriño son ambiciosos. “Esperamos facer unha moi boa tempada e poder conseguir os obxectivos marcados como estar entre os oito primeiros e meternos nesa fase final de Copa que se nos está resistindo nos últimos anos. Toda a xente chegou ben fisicamente e en forma, vése que fixeron o traballo pautado para o verán”, explicou Martínez.
O comezo da Liga Guerreras Iberdrola será o vindeiro 11 de setembro, co Zubileta Evolution Barakaldo como rival para as galegas no primeiro enfrontamento do curso.
