Ninguén dixo que estrearse a nivel estatal ía ser doado. No Pontevedra Rugby Club sábeno ben, pero as dificultades non desaniman ás Irmandiñas. Aínda non foron capaces de sumar unha vitoria, pero xornada tras xornadas loitan con garra no campo. Este domingo, ás 14:30 horas, será o turno ante o Getxto Giroa Veolia.
O duelo ante as vascas supón a volta a casa das galegas despois de tres semanas sen xogar en terra galega. Pero os tries encaixados e os quilómetros en autobús percorridos non apagan a paixón destas novatas da División de Honor B polo deporte oval.
Para esta nova xornada, as xogadoras do Pontevedra RC volven ao seu fortín no que será o terceiro e último partido como locais. O farán xogando ante o Getxo Giroa – Veolia, actualmente o segundo clasificado.
As vascas só caeron ante o Sant Cugat, cun sorprendente 5-21 a favor das catalás nun encontro moi complicado para ambos bandos. Este foi o único rival que se lle resistiu ao próximo contrincante do Pontevedra, e que chega cunha vitoria 62-0 ante o GE i EG.
Pola súa parte, con cinco partidos perdidos, catro deles sen anotar puntos, as Irmandiñas chegan a este duelo na última posición con cero puntos, empatadas co Industriales Las Rozas.
O rugby predomina no Pontevedra
Deixando dun lado a situación deportiva, se algo demostraron as Irmandiñas é que a súa ilusión por ter a oportunidade de xogar e competir é superior a calquera resultado.
Por iso, o partido desta semana será especial, ao ter a oportunidade de desfrutar deste deporte e facelo preto de casa. O plantel do Pontevedra está formado por xogadoras de distintos puntos de Galicia, así que de seguro o factor local será importante este domingo.
Coral Núñez (PRC): “Cando o árbitro pitou o final sentín a partes iguais impotencia e orgullo”
