O Pontevedra repite como visitante, esta vez ante o El Salvador

A División de Honor B segue e con ela crece o Pontevedra Rugby Club (PRC), que segue en busca da primeira vitoria. Esta podería chegar esta fin de semana. As Irmandiñas viaxan a Valladolid para visitar ao Crealia El Salvador, con cita o sábado, 20 de febreiro, ás 17:30 horas.

Polo de agora, as galegas adestradas por Alberto Fernández aínda non foron quen de sumar puntos para escapar da posición de colistas, pero no club coinciden en que a experiencia na competición estatal está traducíndose en melloras.

“Sabiamos que ía ser moi difícil, sen pretempada, cun equipo que tiña que atopar os automatismos e a comprensión e unhas xogadoras con outras sen poder xogar amigables, sabiamos que a propia Liga ía ser o noso crecemento. Pero vemos que ese crecemento é claro, é evidente e nótase”, afirma contundente o técnico. Fernández alaba ao seu grupo, do que di que é “tan bo, tan extraordinario e tan cheo de talento que da gusto”.

Alberto Fernández: “Sabiamos que a propia Liga ía ser o noso crecemento”

As coñecidas como Irmandiñas por proceder de distintos puntos da xeografía galega aínda non foron capaces de vencer a outro equipo, pero isto non as desanima.

Un rival de alto nivel para o Pontevedra RC

No Pontevedra RC saben ben o alto nivel do seu rival para esta tempada. O El Salvador militou o pasado curso na máxima categoría e é un club consolidado do rugby español.

“É un equipo moi grande, moi pesado e que vai intentar levar o partido adiante desde o principio, pero a nós iso non nos ven mal”, analiza o adestrador. Nas súas palabras, “somos un equipo moi duro, moi forte na loita física”.

Por este motivo, Fernández entende que non sitios exteriores, nos que o Pontevedra é forte, non terán moito problema ante as vallisoletanas.

A xogadora Alba De la Fuente coincide en alabar a experiencia e galóns do rival, pero entende que a súa calidade é un factor de motivación para as Irmandiñas. “Viaxamos sabendo que vai ser un partido moi duro, sendo realistas, o máis probable é que volvamos a casa sen a vitoria. Porén, tamén será un encontro clave para seguir mellorando como equipo e individualmente, á vez que fundamentamos o noso xogo”, declara.

Alba De la Fuente: “Será un encontro clave para seguir mellorando como equipo e individualmente”

Segundo De la Fuente, non existe unha “fórmula máxica” para superar a un contrincante, pero entende que a actitude positiva, as ganas e o compañeirismo que caracterizan ao Pontevedra serán as claves que as guien ata a súa primeira vitoria.

A propia xogadora é un exemplo de amor polo rugby. Segundo confesa, “acostumo a sentirme calma antes dos partidos, pero ao chegar aos vestiarios os nervos comezan. Por un lado, sinto as ganas de xogar e competir, polo outro, o temos a fallar en momentos claves. Estes sentimentos apáñanse para revolotear no meu estómago durante o quencemento. Con todo, todo transfórmase ao pisar o campo e escoitar o silbato do árbitro. É como se te chearas dunha enerxía desbordante”, recorda,

Alba De la Fuente: “Todo transfórmase ao pisar o campo e escoitar o silbato do árbitro. É como se te chearas dunha enerxía desbordante”

O simple feito de ter a oportunidade de enfrontarse a un rival desta talla é “un privilexio e unha experiencia inigualable” para esta xogadora.

As Irmandiñas repiten como visitantes

A paixón polo deporte oval pode con todo, incluso coas interminables viaxes en autobús. Despois de desprazarse ata Cataluña a semana pasada o destino deste sábado está nas terras castelás.

“Son viaxes moi longas e debido á COVID-19 e outras cuestións non podemos facelas en avión, entón facer viaxes de 13, 14 horas é durísimo”, sinala o adestrador, Alberto Fernández.

Estes desprazamentos son algo máis liviáns debido á cohesión que existe dentro do grupo. O técnico lamenta que por mor das restriccións non poidan viaxar ao completo nestas ocasións, deixando ás non convocadas en terra. Aínda así, recoñece que “para un club novo na categoría, o xogar máis partidos fóra de casa e seguidos está sendo complicado, pero con este grupo é un pouco menos complicado”.

De la Fuente tamén apunta que preferirían xogar na casa, “para poder sentir o calor de todo o noso equipo e tamén evitar esas viaxes interminables en bus”. Pero tamén sinala que alá onde van síntense arroupadas e “ata estamos pillando o gusto a estar 18 horas nun autobús!”.