O crecemento que se vía no campo cando saltaba ao céspede o Pontevedra Rugby Club (PRC), viuse freado por completo polo Sant Cugat. O líder da División de Honor B foi unha apisoadora para unhas ilusionadas Irmandiñas, que perderon 91-0.
As galegas disputaron a pasada fin de semana a recuperación da terceira xornada ante o club catalán, adiada no seu día por contactos directos cun positivo no Pontevedra RC.
A longa viaxe ata a localidade catalá de Sant Cugat pasoulle factura ás Irmandiñas, que a semana anterior marcaron os seus primeiros ensaios e transformacións pero desta vez non foron capaces de sumar puntos ao seu marcador.
O novato Pontevedra non soubo tratar ao líder
Xa no minuto un, cun try obra de Andrea Moreno, as locais deixaban clara a súa superioridade no campo, e marcaban o que sería a tónica do partido.
Os seguintes puntos para as catalás chegaron en forma de ensaios de Marta Valldeperes, tranformado por Ana María Iglesias, e máis tries de Beatriz González, Martina Serra, Sara Marin e Paula Nieto, con máis transformacións de Iglesias. Sen que o Pontevedra RC puidese facer nada, o Sant Cugat distanciábase con facilidade e acerto no luminoso.
Tras o descanso a tónica do partido non cambiou, e as locais seguiron demostrando porque lideran a categoría de prata do rugby español. Os 36 puntos das catalás fixeron máis que duplicarse, puntuando en case cada minuto ata chegar ao 91-0 final.
Porén, as Irmandiñas seguían loitando no campo catalán sen renderse e coa paixón polo deporte do oval que as caracteriza. O propio club de Pontevedra agradecía no seu perfil de Instagram o compromiso das súas xogadoras, “por non deixar que os ánimos foran a menos e dalo todo ata o final. Unha vez máis o esforzo non se refrexa no resultado, pero seguiremos traballando para que nos próximos partidos así sexa”.
Aínda hai esperanza para a permanencia das galegas, nunha categoría na que só descende un equipo e o Ingenierías Industriales Las Rozas tampouco foi quen de gañar.
Podes revivir o partido dándolle ao play nesta ligazón:
FICHA TÉCNICA
91) CR SANT CUGAT: Paula Nieto, María Cid, Meritxel Tur (capitá), Laura Rey, Marta Valldeperes, María Bardají, Beatriz González, Alba Albarellos, Lidia Martínez, Alexia Gascó, Andrea Moreno, Raquel García, Sara Marin, Martina Serra, Ana María Iglesias. Tamén xogaron: Carla Moraleda, María Soriano, Carla Arca, Elisabet Grané, Ilham Ghouaid, Carla Pagan, Emma Toscano e Cristina García
0) PONTEVEDRA RC: Antía Fraga, Sara Antúnez, Teresa Gálvez (capitá), Patricia Lamas, Aurora Redondo, Laura Lóepz, Alba de la Fuente, Valle Viñas, Carmen González, Mónica García, Patricia Alonso, María Abel, Azucena Alonso, Cristina Ortigueira e Coral Núñez. Tamén xogaron: Ana María Rodríguez, María del Carmen Rodríguez, Carlota Cao, Marina López, Verónica Feteira, María Álvarez, Sara García e Paula García.
MARCADOR:
- Min 1; 0-5 Ensaio de Andrea Moreno
- Min 3; 0-10 Ensaio de Marta Valldeperes
- Min 5; 0-12 Transformación de Ana María Iglesias
- Min 18; 0-17 Ensaio de Beatriz González
- Min 19; 0-19 Transformación de Ana María Iglesias
- Min 27; 0-24 Ensaio de Martina Serra
- Min 28; 0-26 Transformación de Ana María Iglesias
- Min 31; 0-31 Ensaio de Sara Marin
- Min 34; 0-36 Ensaio de Paula Nieto
Descanso
- Min 41; 0-41 Ensaio de Alexia Gascó
- Min 42; 0-43 Transformación de Ana María Iglesias
- Min 45; 0-48 Ensaio de María Cid
- Min 50; 0-53 Ensaio de Andrea Moreno
- Min 64; 0-58 Ensaio de María Soriano
- Min 65; 0-60 Transformación de María Soriano
- Min 68; 0-65 Ensaio de Martina Serra
- Min 69; 0-67 Transformación de Sara Marin
- Min 72; 0-72 Ensaio de Emma Toscano
- Min 75; 0-77 Ensaio de Andrea Moreno
- Min 76; 0-79 Transformación de Sara Marin
- Min 77; 0-84 Ensaio de Martina Serra
- Min 78; 0-86 Transformación de Sara Marin
- Min 80; 0-91 Ensaio de Emma Toscano
ÁRBITRO: Jenny Lee.
INCIDENCIAS: Partido correspondente á xornada 3 ª da División de Honor B de rugby feminino disputado no Campo de Zem La Guinardera.
