Non puido ser. O espírito loitador das Irmandiñas non foi suficiente para manter ao Pontevedra Rugby Club na categoría de prata do rugby español, a División de Honor B. O último encontro, no que se xogaban a permanencia contra o Industriales Las Rozas, rematou en derrota para as galegas (31-17).
No que foi o seu mellor partido como equipo, as galegas demostraron sobre o campo, por se quedaba algunha dúbida, o seu compromiso co equipo e as ganas por seguir competindo un ano máis a nivel estatal. Pero o soño galego remata aquí, polo de agora.
Antía Fraga: “Formamos pouco a pouco un equipo cada vez máis sólido”
Antía Fraga, unha das xogadoras do Pontevedra RC, recorda que o obxectivo do equipo sempre foi “a mellora e aprendizaxe, cousa que creo que se puido ver no noso xogo partido a partido, o do domingo, na miña opinión, o mellor de todos”.
Por iso, prefire facer unha análise positiva, asegurando que en cada xornada levaron “melloras individuais ao colectivo e formando pouco a pouco un equipo cada vez máis sólido”.
O Pontevedra RC loitou ata o final
Con dous equipos que chegaban a este encontro necesitados da vitoria para salvarse, a igualadade deixouse ver sobre o campo, aínda que a maior experiencia de Las Rozas fixo que se adiantaran primeiro no marcador.
No primeiro minuto as locais abriron o electrónico, cun ensaio de Contreras, transformado por González. Isto freou momentaneamente ás Irmandiñas, que non acertaban nos ataques pero se mantiñan na defensa.
Pero chegados ao minuto 8, o Las Rozas atacou de novo, cun ensaio de Villameriel, transformado de novo por González. As galegas xa ían 14 puntos abaixo, cando non pasaran nin dez minutos.
Lonxe de baixar os brazos, as Irmandiñas seguiron apretando e os seus esforzos tiveron recompensa. A súa capitá, Tere Gálvez, foi a autora do primeiro ensaio do Pontevedra RC, xa no minuto 24. Porén, antes do descanso, as locais atacaron de novo, deixando o marcador no 19-5, co partido encamiñado á vitoria pero aínda aberto.
Tras a pausa, as galegas remendaron os seus erros e, como é costume, ofreceron a súa mellor cara. Nesta segunda metade, as xogadoras do Pontevedra RC lograron manter a raia ás rivais, á vez que melloraban o seu ataque.
Os primeiros puntos desta parte foron obra da galega Valle Viñas, que tras un ensaio asinou tamén unha transformación. As Irmandiñas ameazaban con achegarse ao Las Rozas, que tiñan xa a sete puntos de distancia. Por iso, previndo unha distancia menor, Rabilloud anotou outro ensaio local que aumentaba a súa renda. Un minuto despois, González non fallaba e facía outra transformación.
Xa nos minutos finais, Guio faría o último try do Las Rozas, que poñía o 31-12. Pero as galegas tiñan ganas de máis, e antes da fin do partido anotaron outro ensaio, obra de Antúnez, que foi o último do partido.
Un final 31-17 bota por terra os soños galegos de seguir en competición estatal, pero deixa un bo sabor de boca a un conxunto que se deixou a pel competindo.
As sensacións desde o vestiario
Este era un duelo marcado no calendario para as Irmandiñas. Unha delas, Aurora Redondo, sinala que para el “levavamos preparando-nos ao longo das jornadas desde que começou a andadura por DHB para o PRC“.
Por iso, os días previos ao encontro estiveron cargados de emocións, máis positivas que negativas, cunha “boa energia e muita motivaçom”.
Aurora Redondo: “(As rivais) souberom aproveitar varias oportunidades que lhes puxerom numha posiçom de superioridade”
Segundo a xogadora, neste partido puidose ver un nivel semellante en ambos conxuntos, e o Pontevedra RC aproveitaba as posesións para facer un avance penetrante, dificultado pola defensa local.
Redondo sinala que as rivais “souberom aproveitar varias oportunidades que lhes puxerom numha posiçom de superioridade e que impedirom que, a pesar dos nossos ensaios e do trabalho duro ao longo do partido, puidesemos manter a praça”.
A derrota non quita o sorriso das Irmandiñas
Ter perdido o partido e a posición na División de Honor B non entristece ás galegas. Segundo Antía Fraga, este encontro foi “un bo broche ao proxecto das Irmandiñas”.
Antía: “Agora toca volver a DHB o antes posible, mellores e máis fortes”
A xogadora considera que, malia non ter conseguido a permanencia, a mellora do equipo foi palpable. “Agora toca seguir xogando, atopando as compañeiras en fronte con ilusión e esperando volver a DHB o antes posible, mellores e máis fortes”, conclúe.
Ver esta publicación en Instagram
Podes revivir a última actuación como conxunto das Irmandiñas dándolle ao play!
FICHA TÉCNICA
31) AD ING. INDUSTRIALES LAS ROZAS: Contreras, Ferran, Bonacasa, Latas, Otero, Guio, Bueso-Inchausti, Plaza, Chacón (capitá), Rico, Villameriel, González, Ortiz, Rabilloud e Guio. Tamén xogaron: Iguaz, Soria, García-Ogara, De Vega, Gil, Pernas, Zabara e Vallenilla.
17) PONTEVEDRA RC: Fraga, López, Delgado, Lamas, De la Fuente, Antúnez, Ortigueira, Gálvez (capitá), Villar, Viñas, López, García, Alonso, Núñez, García. Tamén xogaron: Ana María Rodríguez, María del Carmen Rodríguez, Carlota Cao, Verónica Feteira, Pula García, Carmen González e María Abel.
MARCADOR:
- Min 1; 5-0 Ensaio de Contreras
- Min 2; 7-0 Transformación de González
- Min 8; 12-0 Ensaio de Villameriel
- Min 9; 14-0 Transformación de González
- Min 24; 14-5 Ensaio de Gálvez
- Min 36; 19-5 Ensaio de Guio
Descanso
- Min 56; 19-10 Ensaio de Viñas
- Min 57; 19-12 Transformación de Viñas
- Min 59; 24-12 Ensaio de Rabilloud
- Min 60; 26-12 Transformación de González
- Min 65; 31-12 Ensaio de Guio
- Min 79; 31-17 Ensaio de Antúnez
ÁRBITRO: Juan José López.
INCIDENCIAS: Partido correspondente á xornada 7ª da División de Honor B de rugby feminino disputado no Campo de El Cantizal.
