As Irmandiñas do Pontevedra Rugby Club despedíronse do seu campo prestado, en As Lagoas (Ourense), cunha derrota ante o Getxo Giroa Veolia. As galegas perderon ante as vascas por un 5-56, pero o fixeron asinando un ensaio.
Non foi unha vitoria pero, en palabras da galega Sara López, “viu ben para recuperar sensacións. Viñamos de dúas xornadas duras con resultados en contra moi abultados e neste partido saímos bastante contentas”. Xogar en casa, ante o seu público e o bo tempo foron os factores detrás deste sentimento.
Sara López: “Viñamos de dúas xornadas duras con resultados en contra moi abultados e neste partido saímos bastante contentas”
Con estes ánimos, e afortunadamente sen lesións, enfrontan as Irmandiñas o único encontro que queda para que remate a tempada. Nel as galegas xogaranse a súa permanencia na División de Honor B.
Con seis partidos disputados, e un pleno de derrotas, o Pontevedra RC ocupa a posición de colista cunha diferenza de 400 tantos en negativo, entre anotados e recibidos.
Non puideron as Irmandiñas co Getxo, un equipo que colleu o mando do partido nos primeiros minutos e logrou unha vantaxe que remataría por darlle a vitoria. Non necesitaron nin dez minutos para golpear primeiro, cun ensaio de Reding no minuto 8.
A defensa galega pechouse e foi quen de aguantar os ataques rivais durante dez minutos máis, pero chegados ao 18, Agirre marcaría o segundo para as visitantes.
Así, as vascas abriron a lata, comezando a anotar con maior facilidade e frecuencia ata acadar o 0-39 para o descanso.
Segundas partes sempre son boas para o Pontevedra RC
Como ven sucedendo en varios partidos desta tempada, o Pontevedra RC reacciona na segunda metade e mostra a súa mellor cara.
Tras o paso por vestiarios o Getxo seguiu anotando, pero con maior dificultade que na primeira parte. Lonxe de rendirse, as Irmandiñas pelexaron e presionaron ata lograr o primeiro e único tanto da tarde, da man da súa capitá, Teresa Gálvez.
Este try logrado no minuto 64 chegou xa algo tarde, e as glaegas non puideron facer nada para remontar o partido. Cun par de ensaios e unha transformación máis no bando rival rematou o encontro, co 5-56 final.
Myriam: “A melloría na segunda parte é o resultado de contrastar entre todas os puntos débiles que vemos noutro equipo”
Myriam, xogadora do Pontevedra RC, explica que as frecuentes melloras nas segundas metades débense a que “é o resultado de contrastar entre todas os puntos débiles que vemos noutro equipo durante o descanso. Collemos forza, saímos ao campo a seguir dando o mellor”.
Pero tamén é autocrítica, e recoñece que esta actitude é algo “que teríamos que poñer en práctica desde o primeiro minuto”
Pola súa parte, a súa compañeira Sara López non ten tan claro os motivos polos cales neste equipo o refrán ‘segundas partes nunca foron boas’ é ao revés. Segundo a xogadora, a explicación está en que pasados os minutos, aumenta a concentración.
A valoración da MVP
A derrota non se explica pola falta de talento e dedicación nas filas galegas. A pesar de non gañar, Myriam foi elixida MVP no último partido.
Malia os erros a corrixir, a xogadora recoñece o traballo propio e o das súas compañeiras, destacando que “o partido foi duro, pero atacamos máis que de costume, fumos máis rápidas nos saques de golpe de castigo, cousa que nos beneficiou en gañar algúns metros”.
“Todas queremos máis”
O curso está a piques de rematar. Só queda unha xornada, pero as Irmandiñas queren máis. Así o expresa Sara López, quen reclaca que “a semana e media da última xornada de Liga, creo que falo en nome de todas cando digo que pese aos desprazamentos, nervios de antes e dores de despois de xogar e os palitos polo nariz, isto se está pasando moi rápido”.
Esta foi a tempada debut das xogadoras do Pontevedra RC, e as derrotas non empañan a súa ilusión por xogar e competir a nivel estatal. “Algo que todas temos claro é que queremos máis”, recorda a xogadora.
FICHA TÉCNICA
5) PONTEVEDRA RC: Nuria Diéguez, Sara Antúnez, Paolma Delgado, Antía Fraga, Patricia Lamas, Sabela Chan, Laura López, Teresa Gálvez (capitá), Carmen González, Valle Viñas, Sara López, Myriam García, Azucena Alonso, Coral Núñez, María Abel. Tamén xogaron: Ana María Rodríguez, María del Carmen Rodríguez, Aurora Redondo, Carlota Cao, Sara García, María Álvarez, Paula García e Marta Rebollo.
56) GETXO GIROA VEOLIA: Iratxe Uriarte, Paula Echevarría, Ana Masa, Irantzu Carral, Itsaso Reina, Jare Torralba, Ángela Soria, Belsay Escudero, Ana Herrán (capitá), Maider Aresti, María Antonella Reding, Dana Jean Alimena, Nerea Agirre, Maider Gutiérrez e Haizea Serrano. Tamén xogaron: Lucía Masa, María Cristina Cava, Garazi Uriarte, Sofía Le Maitre, Uxue Ramírez, Begoña Areitio, María Pérez e Lorea Basterrechea.
ÁRBITRO: Tatiana Yunta.
INCIDENCIAS: Partido correspondente á xornada 6ª da División de Honor B de rugby feminino disputado no Campo de As Lagoas.
