O Pontevedra RC estrea marcador pero non vitoria (12-36)

A vitoria segue dándolle esquinazo ás galegas do Pontevedra Rugby Club, pero as novatas da División de Honor B xa poden dicir que marcaron os seus primeiros ensaios na segunda mellor categoría do rugby español. Foi no partido ante o XV Hortaleza RC, que resultou en derrota malia a gran segunda parte galega (12-36).

Este foi o primeiro encontro das Irmandiñas en terras pontevedresas. Xogar en casa foi case un talismán, que se ben non foi suficiente para a vitoria, logrou que as galegas fixeran o mellor partido da tempada.

Non se presentaba fácil este reto. O Hortaleza fai gala do seu gran nivel competitivo e despois de tres partidos ocupa xa a cuarta posición da clasificación, a catro puntos das líderes, o Sant Cugat.

As dragonas dominaron por completo a primeira parte do encontro. Nas súas filas destacaron especialmente María Gómez e Andrea Fernández, que conxuntamente sumaron 16 puntos para as madrileñas.

A posible vitoria do Pontevedra RC pasaba pola fazaña dunha remontada, un escenario ao que as galegas xa están acostumadas. A diferenza principal foi que nesta ocasión, para o tempo do descanso o rival só gañaba por catro ensaios e tres tranformacións: 0-26.

O Pontevedra RC faise forte na segunda metade

Como xa apuntaban na previa a xogadora Valle Viñas e o segundo adestrador Rubén Sanmartín, o Pontevedra RC é un grupo cada vez máis forte fóra e dentro do campo.

E a este conxunto dáselle ben as segundas partes. Así, como sucedeu no anterior encontro que disputaron as Irmandiñas, a segunda metade do duelo foi boa e o xogo do equipo mellora co transcurso do tempo.

Dous minutos tras a pausa foron suficientes para que chegase o momento tan esperado polas galegas: o seu primeiro ensaio. Un grupo novato na categoría, formado por xogadoras de distintos equipos da xeografía galega e nun equipo formado pola paixón de desfrutar do deporte oval nunha competición nacional, materializou por primeira vez o resultado dos seus esforzos.

Así, o Pontevedra RC poñía o marcador nun 5-26 ilusionante grazas ao acerto de Azucena Alonso. Con todo, o impulso dos puntos non foi suficiente para iniciar a remontada e uns 15 minutos despois as dragonas respondían cun ensaio obra de Iratxe Aranburu.

As Irmandiñas aínda tiñan máis que dicir e quixeron repetir as sensacións de anotar puntos. Desta forma chegou, no tramo final do partido, un ensaio de Valle Viñas transformado por ela mesma. A falta de menos de dez minutos para o final, o marcador xa sinalaba o 12-31.

Cun ensaio final de Andrea Camps finalizou o encontro, que se ben non serve para que as galegas abandoen a posición de colistas, promete un futuro moi esperanzador para o cadro de Pontevedra.

FICHA TÉCNICA

12) PONTEVEDRA RC: Nuria Diéguez, Sara Antúnez, María Rodríguez, Patricia Lamas, Alba de la Fuente, Valle Viñas, Laura López, Teresa Gálvez (capitá), Lucy Villar, Mónica García, Myriam García, María Abel, Azucena Alonso, Cristina Ortigueira e Coral Núñez. Tamén xogaron: Gema Lago, Paloma Delgado, Antía Fraga, María del Carmen Rodríguez, Patricia Alonso, Aurora Redondo, Sara López e Paula García.

36) XV HORTALEZA RC: Paula Miguel, Laura Alonso, Mónica Arias, Alba Boyano, Andrea Camps, Marta Ventura, Laura Alonso, Andrea Fernández, María Gómez, Nuria Núñez (capitá), Yenier Rodríguez, Yenifer Rodríguez, Inés López, Silvia Carmona e Iratxe Aranburu. Tamén xogaron: Carmen Llavero, Carolina Vadillo, Patricia Bravo, Sirenia Bercedo, Juliera Sánchez, Laura González e Isabel Miguel.

MARCADOR: