A derradeira xornada da segunda fase da Primera División chega cargada de emocións. O Poio Pescamar loitará por defender a súa terceira posición ante o quinto clasificado, o AD Alcorcón, que aínda aspira a colarse no play-off polo título. O partido será o sábado, 29 de maio, ás 18:30 horas (web CRTVG).
Actualmente, as vermellas son as favoritas para disputar a final a catro, despois dos todopoderosos Futsi Atlético e Burela, que ademais se enfrontan nesta fin de semana. Os outros dous billetes para o play off seguen en xogo, con tres equipos en loita por acadar o pase. Ademais do Poio e o Alcorcón, o Roldán tamén está na liza polo acceso á seguinte fase.
As conserveiras só precisan un empate para colarse no play-off, xa que acumulan 45 puntos e un coeficiente do 1,956 despois de 14 vitorias, tres empates e seis derrotas.
Antía Pérez, do Poio, segue lesionada, pero non de gravidade
Para este encontro será baixa Antía Pérez, quen se mancou no último partido disputado polo Poio Pescamar. A lesión quedou practicamente nun susto, xa que a futbolista puido descartar nas probas médicas posteriores a rotura do ligamento do seu xeonllo.
Os resultados apuntan a unha escordadura de xeonllo, polo que a ourensá deberá estar tres semanas de baixa. Con este pronóstico, Antía non volverá ás pistas previsiblemente no que resta de tempada.
