O Poio Pescamar aínda non foi quen de vencer na segunda fase da Primeira División de futsal, pero está a un paso de entrar nos catro primeiros clasificados. Nesta xornada, as galegas reciben ao FSF Móstoles, este sábado 10, ás 18:30 horas.
Malia un balance dun empate co Torreblanca Melilla na primeira xornada e unha derrota no duelo galego contra o Burela na segunda, as de Manu Cossío (recentemente renovado), están a dous puntos do cuarto, o propio Melilla.
O Poio terá que facer fronte a dúas das máximas goleadoras
Nesta fin de semana, as galegas xogarán como local ante un equipo ao que superan só por un empate, e por tanto están a punto de distancia. Todo indica que este partido estará moi competido, entre dous clubs que queren asegurarse canto antes un posto no play off polo título.
Porén, en contra do Poio, estarán dúas futbolistas que entran no top de máximas goleadoras da categoría. O conxunto do Móstoles conta con Inma e Alicia Benete, cuarta e quinta máximas anotadoras respectivamente con 19 e 18 tantos cada unha delas. Quen non estará como visitante é Pilar Ros, xa que comeza o proceso de rehabilitación da súa lesión.
O encontro poderá seguirse vía streaming a través do Youtube do Poio.
