A 17ª xornada da Primeira División chegaba cun encontro da zona alta da clasificación e un duelo do futsal galego. O Poio Pescamar recibía ao Ourense Envialia e vencía na casa cunha remontada 2-1.
O encontro celebrado en A Seca estivo moito máis disputado do que cabría esperar atendendo á clasificación. Antes do partido oito puntos separaban ás galegas, ocupando o Poio Pescamar a segunda posición e o Envialia a cuarta. Tras disputar o mesmo as posicións manténse, cun conxunto pontevedrés a un punto do líder e un ourensán que segue entre os catro primeiros.
Duelo intenso entre Poio e Envialia
Desde os primeiros minutos a pista de Poio deixou ver unha alta intensidade en ambos bandos. Os dous equipos tiveron múltiples ocasións, forzando ás dúas gardametas a intervir en varias ocasións. Se Antía freaba a Jenny Lores, Vane tiña que esforzarse para evitar o gol local.
Así, cun vaivén de achegamentos, o primeiro gol non chegaría ata o minuto 11. Marta, capitá das visitantes, materializaba o primeiro tanto para o seu equipo despois dunha xogada de saque de banda con Jenny Lores e Iria Saeta. O conxunto que adestra o técnico galego Morenín mostrábase cómodo como visitante, sabendo manter o ritmo do equipo de Manu Cossío.
A resposta local ao gol do Ourense Envialia non chegaría ata a segunda parte. Antía, despois de crear dúas ocasións en minuto e medio, marcou á terciera o primeiro para o Poio Pescamar tras o tiro de Ana Rivera.
Nesta segunda parte o Poio era máis forte e estaba decidido a levarse o partido. Unha vez conseguido o empate, o tanto da vitoria non tardaría en chegar, materializandose un par de minutos despois.
Julia Dupuy anotou o segundo para as locais aproveitando un rechace de Vane Barberá tras o disparo de Antía. O Envialia seguiu aprentando para retomar o control do partido, competindo xa cun xogo de cinco con Iria Saeta como porteira – xogadora, ás ordes de Morenín. Pero os cambios do adestrador non foron suficientes, sumados ás paradas de Silvia ante as ofensivas de Chiky e Marta, e a vitoria quedou na casa.
As lesións seguen castigando ao Envialia
Á fin do partido o Envialia lamentaba en redes a derrota, á vez que alababa o tesón das súas xogadoras. Un equipo que nas últimas xornadas ten problemas para sumar e está perseguido polas lesións.
Só neste último encontro mancárose Vane, por unha luxación dun dedo e María Arias e Judith. As tres se atopan ben, pero seguirán competindo tocadas.
FICHA TÉCNICA
2) POIO PESCAMAR: Silvia Aguete; Luci, Ana Rivera, Antía e Irene García –quinteto inicial-. Tamén xogaron:Miriam, Dani Sousa, Iraia, Agostina Chiesa, Clara e Julia Dupuy.
1) OURENSE ENVIALIA: Vane, Chiky, Marta, Iria Saeta y María Arias – quinteto inicial -. Tamén xogaron: Jenny Lores, Judit e Carmen.
GOLES: 0-1, min. 11 Marta. 1-1, min. 24 Antía. 2-1, min. 26 Julia Dupuy.
INCIDENCIAS: Partido correspondente á 17ª xornada do Grupo A da Primeira División Nacional Feminina de Fútbol Sala RFEF celebrado en A Seca.
