O calendario marcaba esta fin de semana como o duelo entre o Poio Pescamar e o Futsi Atlético Navalcarnero. Porén, a reorganización da axenda de futsal cambiou os plans das galegas. Aproveitando que o CD Leganés descansaba esta xornada, as poienses recuperarán con elas o seu partido adiado. O duelo será o sábado, 20 de febreiro, ás 19:30 horas.
Este cambio ven motivado pola reunión do Comité Nacional de Fútbol Sala da RFEF cos clubs de Primeira División e Segunda División. Esta xuntanza concluiu un cambio no calendario para disputar as xornadas adiadas por mor da COVID-19. Así, o esperado encontro contra as colíderes xogarase o 20 de marzo.
O obxectivo do Poio cambia nesta fin de semana. As galegas deberán buscar a cuarta vitoria consecutiva en casa ante o quinto clasificado do Grupo B.
Doce puntos separan a galegas e madrileñas, ocupando as primeiras o segundo posto pero empatadas a puntos co primeiro, o Futsi Atlético Navalcarnero. Mentres que o CD Leganés ten un equilibrio de cinco derrotas e cinco vitorias, ademais dun empate, o Poio Pescamar suma nove trunfos e só unha derrota e un empate.
Ademais, ambos conxuntos chegan con sensacións dispares. Mentres que as pontevedresas están nun momento doce, sumando de tres en tres e sen que a apretada axenda o impida, as madrileñas non poden dicir o mesmo.
No seu último partido disputado, o Leganés caeu por un contundente 6-0 ante o Futsi Atlético, que non deixou ningunha opción ás entón visitantes de asinar nin o gol da honra.
O Poio xa goleu ao Leganés na ida
No anterior enfrontamento entre estes dous equipos nesta tempada, as galegas asinaron unha gran goleada fronte ao Leganés. O partido, que tería que ter aberto o curso por ser da primeira xornada, celebrouse en decembro, cun 2-6 a favor do Poio Pescamar.
Esta nova edición do duelo entre madrileñas e galegas poderá seguirse vía streaming no Youtube do Poio Pescamar.
