O Poio Pescamar non foi quen de amarrar a segunda posición na primeira parte da tempada, pero ten opcións de loitar polo título. Na primeira xornada desta segunda fase as vermellas recibirán ao Torreblanca Melilla e a unha cara coñecida, o adestrador visitante Marcial Santos. A cita será o sábado 27, ás 20:00 horas.
Nesta segunda fase, os oito mellores equipos dos dous grupos da Primeira División loitarán polo acceso á final de 4, da que sairá o campión de liga. Debido a que non todos os conxuntos puideron disputar o mesmo número de partidos, elaborouse unha clasificación seguindo o coeficiente obtido polos clubs.
Primeira proba para o Poio
Así, o Poio Pescamar chega na quinta posición na xeral, unha por debaixo do Melilla, que actualmente é quen marca o último posto de acceso á final. Este será un duelo importante para as galegas por dous motivos: as posibilidades que ofrece vencer a un rival parello, e por contar co factor local, xa que competirán en A Seca onde só perderon o partido contra o Futsi Atlético.
O Poio remata na terceira posición tras perder ante un rival polo título (1-2)
Como rival estará un equipo recentemente ascendido e que está a dar a sorpresa, quedando só por detrás do todopoderoso Burela no seu grupo, e con grandes xogadoras internacionais como Emily Marcondes. Nas filas locais, é dúbida Carol Agulla, con molestias no xeonllo que lle impedirían xogar.
No banco visitante, dirixindo ao plantel do Melilla estará Marcio Santos, ex adestrador das galegas. O técnico brasileiro foi o responsable do ascenso do Poio á máxima categoría, a clasificación para a Copa da Raíña e dúas Copas Galicia. Esta tempada cumpriu xa con creces o obxectivo melillense da permanencia.
