O Poio Pescamar afrontaba a última xornada coa oportunidade de facer historia e meterse por primeira vez no play-off polo título, pero esta tempada tampouco puido ser. As galegas caeron ante o AD Alcorcón por un 1-3, polo que perden a terceira posición e o billete de acceso á seguinte fase.
Antes de disputar este encontro, as conserveiras eran as mellor posicionadas, despois do Futsi Atlético e o Burela, para acceder á final a catro da Primera División. Pero o STV Roldán e o Alcorcón (rival das galegas) viñan por detrás pisando forte. Finalmente, estes catro equipos serán os que loiten por proclamarse campión.
O Alcorcón mantivo ao Poio contra as cordas
Nos primeiros instantes do duelo o Alcorcón avisaba da súa intención de ir a por todas e colarse no play off. Un tempraneiro disparo de Irene Samper deixaba claro que as amarelas xogarían ao todo ou nada na derradeira xornada.
Pola súa parte, o Poio intentaba monopolizar a posesión, pero non tiña acerto fronte a rede contraria, polo que os seus ataques non chegaban a porto. As madrileñas xogaban sobre a pista da Seca con confianza. Isto tradúxose nun tanto de Aída de Miguel que subiu ao marcador das visitantes, anotando a porta baleira tras un roubo de balón en tres cuartos da ourensá Vane Sotelo.
O encontro seguiu desenvolvéndose con maior dinamismo nas amarelas, mentres que o Poio intentaba sobrepoñerse a un rival claramente superior. O Alcorcón seguía buscando o segundo cun remate de Claudia López e outro de Irene, ambos sen éxito.
Co partido entrado xa na fase final da primeira parte, as xogadoras de Manu Cossío comezaron a reaccionar e reclamar o dominio do duelo, co hándicap do gol en contra e varias faltas acumuladas. A tensión era cada vez maior nun encontro con moito en xogo, e as porteiras perfiláronse como fundamentais, con grandes paradas a ambos lados da pista.
O Poio non reaccionou a tempo
Na segunda parte, o Alcorcón seguiu sendo superior na cancha, mentres que as galegas tiñan que afrontar de novo un gol nos primeiros minutos. Tres minutos despois da reanudación, Vane Sotelo iniciaba unha xogada gañando a liña de fondo pola banda esquerda, servíndolle o balón na área a Nerea Moldes, quen puxo o 0-2 no marcador.
O terceiro tanto amarelo non se fixo esperar. Pouco despois do gol de Moldes, Pepa subía o 0-3 ao electrónico a pase de Irene Samper na banda dereita.
O Poio, xa desesperado, vía escapar as súas opcións de disputar o play off polo título, pero seguía loitando con forza. A falta de seis minutos para o final, Dani Sousa remataba desde a frontal da área para facer o 1-3 e dar ánimos ás galegas.
O empate servíalles para pasar de fase, pero o tempo corría xa na súa contra. Entón, Cossío decidiu apostar polo xogo de cinco con Irene García como porteira-xogadora, buscando calquera oportunidade de salvar un punto á fin do partido.
Antes do pitido final, as vermellas tiveron unha gran ocasión cun disparo de Chiesa, que porén deu no pau botando por terra os soños das conserveiras. O 1-3 final arrebátalles a posibilidade de competir por ser campioas, e permite a clasificación das súas rivais, o AD Alcorcón de Vane Sotelo.
Final del partido en A Seca 🏁
Amarga despedida a esta inusual temporada, quedándonos a las puertas de entrar en nuestro primer playoff por el título 😞#PoioPescamar 1 – 3 @ADAlcorconFSF #PoioPescamar #PoioAlcorcón #HistoriaRojilla pic.twitter.com/t3a8OCt6j5
— Poio Pescamar FS (@PoioPescamarfs) May 29, 2021
FICHA TÉCNICA
POIO PESCAMAR: Silvia; Luci, Clara, Ana Rivera e Dani Sousa -cinco inicial-. Tamén xogaron: Julia Dupuy, Chiesa, Miriam, Iraia e Irene García.
AD ALCORCÓN: Estela; Vane Sotelo, Irene Samper, Nerea Moldes e Aída de Miguel -cinco inicial-. Tamén xogaron: Laura Oliva, Claudia López, Pepa e Paula.
GOLES: 0-1, min. 2 Aída de Miguel; 0-2, min. 23 Nerea Moldes; 0-3, min. 26 Pepa; 1-3, min. 34 Dani Sousa.
ARBITRAXE: Crespo Pardo e Darriba Villamor (colexio galego). Recibiron tarxeta amarela Aída de Miguel e Laura Oliva na AD Alcorcón e Ana Rivera no Poio Pescamar.
INCIDENCIAS: Partido da oitava xornada da segunda fase celebrado no pavillón da Seca en Poio.
