O Poio Pescamar remata a primeira fase da competición na terceira posición, tras perder ante o todopoderoso Futsi Atlético Navalcarnero (1-2). As madrileñas serán un dos rivais máis duros das galegas nos play-offs polo título.
Non se presentaba doado o último reto das galegas nesta primeira fase, que recibían en casa a un equipo que non perdeu ningún encontro desta primeira parte da competición. E non o foi, nun partido no que o Poio lograba o empate momentáneo, pero saía derrotado.
O Poio tratou de ti a ti ao mellor equipo do seu grupo
Cossío viuse obrigado enseguida a cambiar os seus plans iniciais, pola tarxeta amarela que recibiu nos primeiros segundos de xogo Iraia. O Poio Pescamar tivo que mover banco, e recompoñerse para non perder a concentración no partido.
Un par de minutos despois chegaría a primeira ocasión para as locais, da bota de Dani Sousa, que xogando como pivote conseguiu realizar un disparo polo baixo, sen fortuna ao estar Belén en portería lista para paralo. Nas visitantes, Ari creou tamén unha xogada de perigo que non chegou a subir ao marcador.
Este abriríase con Ju Delgado, xa no minuto 7, despois dun robo de balón de Ari, batendo a Caridad desde o costado esquerdo, anotando o 0-1 cun disparo cruzado.
Pouco despois do primeiro tanto chegou a primeira tarxeta para as madrileñas, sendo unha amarela para Leti. O Poio Pescamar non se deixaba amedrentar e seguía presionando para anotar á vez que evitando o segundo gol do Futsi Atlético.
Unha ocasión de Anita Luján e Leti foi freada por Caridad nun man a man coa primeira, para despois ter as galegas a ocasión de puntuar nun contragolpe con pase de Ana Rivera a Dani Sousa.
Precisamente, esta sería a futbolista que lle daría o gol ao Poio, á borde da fin do primeiro tempo. Co descanso cada vez máis preto, pero aínda por debaixo no marcador, Cossío solicitou un tempo morto no minuto 18. Os seu ánimos deron resultado, e así chegou desde o costado o gol de Sousa, que poñía o empate no marcador con toda a segunda metade aínda por disputar.
O Futsi rematou o partido na segunda parte
Cun ritmo similar ao visto na primeira parte, a segunda comezou cun conxunto visitante potente e un cadro vermello cumpridor.
O Poio Pescamar acusou finalmente a tensión do xogo, polo que Caridad viuse obrigada a intervir en varias ocasións para evitar o segundo gol do Futsi, ante as perdas das súas compañeiras nas saídas de balón. A ocasión máis clara viu da man de Luján e Delgado, ante as cales a gardameta local tivo que facer unha dobre parada.
Xa algo máis recompostas, as galegas conseguiron controlar o ritmo do partido momentáneamente, pero o segundo gol rondaba a portería galega e non tardaría en chegar.
No minuto 30, Anita Luján iniciaba unha xogada pola banda esquerda, colocando o balón na área onde Irene estaba lista para recibir e rematar. Un disparo que Caridad non foi quen de frear, e que subiu ao marcador no bando visitante.
As xogadoras vermellas intentaron de novo o empate nos minutos restantes, pero sen éxito. No minuto 32 Cossío solicitaba de novo parar o tempo, pero desta vez as súas indicacións non xurdiron o mesmo resultado.
Xa á desesperada, e a falta de tres minutos, o adestrador do Poio Pescamar colocou a Irene como porteira-xogadora, conseguindo xerar varias oportunidades, como un disparo de Sousa, que finalmente non subirían ao marcador. Cun 1-2 final, o conxunto conserveiro prepara xa a segunda fase.
Revive o último encontro da primeira fase do Poio Pescamar, ante o Futsi Atlético.
Coa vista posta na segunda fase
Con este resultado, as de Cossío chegarán desde a terceira posición do Grupo A aos play offs. En total, sufrindo só tres derrotas (todas nas últimas xornadas) ante dous equipos: Futsi Atlético e Roldán, as galegas rematan esta fase con 35 puntos.
Así, a partir desta fin de semana as pontevedresas preparan a loita polo título. No seu grupo competirán con outras dúas galegas: o Burela e o Envialia, e equipos como o propio Futsi Atlético, Roldán, Melilla SC Torreblanca, AD Alcorcón e Móstoles.
Pero antes, este martes xogarán co Ourense Envialia para poder clasificarse para a final da Copa Galicia de futsal.
FICHA TÉCNICA
1) POIO PESCAMAR: Caridad, Lucía, Ana Rivera, Dani Sousa e Clara – quinteto inicial -. Tamén xogaron: Iraia, Irene García, Chiesa, Julia Dupuy e Miriam.
2) ATLÉTICO NAVALCARNERO: Belén, Amelia Romero, María Sanz, Ari e Irene Córdoba– quinteto inicial -. Tamén xogaron: Leti, Ju Delgado, Anita Luján, Becha, Lorrana e Marta Balbuena.
GOLES: 0-1, min. 7 Ju Delgado. 1-1, min. 20 Dani Sousa. 1-2, min. 30 Irene Córdoba.
ÁRBITROS:Carreira Romero e Ferrero Carballal do colexio galego. Amoestaron a Iraia e a Antía no Poio Pescamar e a Leti e María Sanz no Futsi Navalcarnero.
INCIDENCIAS: Partido correspondente á 15ª xornada do Grupo A da Primeira División Nacional Feminina de Fútbol Sala RFEF celebrado no pavillón de A Seca.
