O Poio Pescamar viaxa ao pavillón Guadaljaire de Málaga para enfrontarse ó Atlético Torcal, 12º clasificado da Primera Iberdrola do fútbol sala. O partido disputarase o sábado 6 de abril a partir das 18:00 horas.
Prolongouse o momento doce na tempada das conserveiras do Poio Pescamar coa consecución da cuarta Copa Galicia a semana pasada. Nun moi igualado derbi da ría ante o ENCE Marín Futsal. O conxunto vermello vencía por 2 – 1 na prórroga, encaixando un gol por primeira vez en catro partidos.
En liga o Poio Pescamar enlaza xa sete triunfos seguidos, o que permitiu ás conserveiras conseguir praza no play-off, aínda que cos mesmos puntos que o Alcorcón. Por iso, non queda outra que seguir gañando se as de Poio queren depender de si mesmas, sexa o rival que sexa.
O Atlético Torcal será un rival durísimo, pois gañou os seus últimos catro partidos, sendo o terceiro equipo máis en forma do momento (por detrás do Burela e do Poio Pescamar). De feito, veñen de conseguir o resultado máis avultado de toda a campaña, un 1 – 10 na pista do Viaxes Amarelle FSF. Con 76 goles a favor, 6 máis que nós, son o cuarto equipo máis realizador.
Destaca neste equipo África Lozano con 19 goles anotados, que é cuarta na lista de goleadoras. Iso si, recibiron 69 tantos (por 46 no noso caso).
A súa gran segunda volta permitiulles deixar a 11 puntos os postos de descenso, polo que o obxectivo da permanencia no seu regreso á máxima categoría está practicamente pechado.
Na primeira volta venceu o Poio Pescamar por 3 – 1 con dous goles no último suspiro do partido. Como antecedente está o curso 2021 / 2022, no que as galegas empataban co seu rival desta 24ª xornada a tres goles na Seca e gañaban por 0 – 3 en terras malagueñas.
