As futbolsitas do Poio Pescamar son as novas Raíñas de Copa de Galicia. O conxunto poiense proclamouse este martes no Concello de Marín campión da Copa Galicia feminina de fútbol sala tras derrotar na quenda de penaltis ao conxutno do Ourense Envialia tras un encontro vibrante e cheo de alternativas e ocasións para os dous colectivos. A competición está organizada pola RFGF.
O Ourense Envialia foi quen de golpear primeiro no minuto 7 grazas a un tanto de Iria Saeta. A xogadora do colectivo ourensán aproveitou un saque de banda para poñer por diante ao seu equipo na gran final da Copa Galicia.
O tanto ourensán animou a gran final. O Poio Pescamar foi arriba na procura do empate e o elenco dirixido por Morenín tivo o 0-2 moi preto froito dun lanzamento de Chiky.
A recta final da primeira metade foi unha tolemia, posto que no intercambio de golpes puideron chegar varios goles. Malia todo, co 0-1 no electrónico do pavillón da Raña chegouse ao descanso na gran final do futsalfem galego.
Logo do paso por vestiarios, o Poio Pescamar tivo ata tres ocasións nos primeiros sete minutos da segunda metade para igualar a gran final nas botas de Martita. Tamén tivo o 0-2 o Ourense Envialia nun lanzamento de Laura Uña que sacou baixo paus Luci Gómez.
Os últimos dez minutos foron trepidantes. O Poio Pescamar que adestra Manu Cossío, buscaba o empate e o Ourense Envialia a sentenza. Quen tivo o premio foi o conxunto poiense a falta de tres minutos para o final grazas ao tanto de Dani Sousa nunha gran acción individual.
Co empate 1-1 chegouse ao final do partido. Na prórroga tamén houbo ocasións para os dous finalistas, pero sería a quenda de penaltis a que ditaría sentenza.
No momento da verdade, Caridad fíxose grande para dar ao Poio Pescamar a súa terceira Copa Galicia da Real Federación Galega de Fútbol (RFGF)
FICHA TÉCNICA:
1) POIO PESCAMAR FS: Caridad; Irene, Luci, Anna, Dani Sousa. Tamén xogaron: Jane, Martita, Luisa, Agostina, Ana Rivera e Dupuy.
1) OURENSE ENVIALIA FS: Vane; Jessica, Laura Uña, María Arias, Jenny Lores. Tamén xogaron: Elisabeth, María Estévez, Iria Saeta, Marta, Judith, Robinha, Sara Moreno, Carla e Zaide.
GOLES: 0-1 Iria Saeta (7′); 1-1 Dani Sousa (37′).
EQUIPO ARBITRAL: Coello Martínez e Crespo Pardo.
INCIDENCIAS: Final da Copa da Galicia de Fútbol Sala Feminino disputada no Pavillón de A Raña (Marín).