Triunfo do Poio Pescamar diante da Penya Esplugues por 2-0. As galegas mandaron no partido desde o pitido inicial pero tiveron enfronte a un teimoso e combativo Penya Espluges ao que a fortuna non acompañou. En varias ocasións os paus salvaron as pontevedresas de recibir gol.
Aos seis minutos de xogo xa ían por diante no electrónico cun gol que asinaba Antía. A futbolista anotaba a través dun forte tiro diante do que pouco ou nada puido facer Muniesa.
Un remate ao pau de Roser advertía ás galegas que as catalás tamén sabían desto do cinco contra cinco. O Poio Pescamar dixo ‘oído cocina’ e tentou madurar o tempo do xogo e limitar as chegadas do Penya Esplugues que loitaba por devolver ás táboas ao luminoso do Príncipe Felipe de Pontevedra.
Superada a primeira parte o segundo periodo seguiu o mesmo curso. O Poio por diante e traballando para controlar o ritmo, e o conxunto catalán sen renderse buscando un empate que non chegaría.
Pola contra o que chegou foi o segundo gol das locais. O tanto asinouno Dani Sousa que regateaba a Anna Muniesa e anotaba o 2-0 para o Poio Pescamar.
Nin o xogo de cinco da Penya foi quen de mover o marcador electrónico dese 2-0 co que as de vermello chegarían ao final do choque.
O Poio colócase segundo na clasificación
Este triunfo colleitado pola escuadra galega, sumado á derrota do STV Roldán FSF (3-1 diante do Leganés) aupan ás pontevedresas á segunda plaza na táboa clasificatoria. O Poio Pescamar está tres puntos por debaixo do Futsi Atlético Navalcarnero, líder invicto do Grupo B da Primeira División do Fútbol Sala Feminino da RFEF.
As de Manu Cossío céntranse agora nas semifinais de Copa que se van disputar a vindeira semana. De feito, na liga, a décima xornada disputarase xa no vindeiro ano, contra o 17 de xaneiro e nela o Poio Pescamar recibirá xustamente ao CD Leganés FS que ocupa a cuarta praza con 12 puntos e se impuxo ao STV Roldán FSF esta semana.
FICHA TÉCNICA
POIO PESCAMAR: Caridad; Luci, Ana Rivera, Irene García e Dani Sousa – quinteto inicial- . Tamén xogaron: Agostina Chiesa, Antía, Clara, Mirian, Cárol, Julia Dupuy e Iraia.
PENYA ESPLUGUES: Anna Muniesa; Martita, Berta Velasco, Laia Beltrán e Ruth – quinteto inicial- . Tamén xogaron: Irina, Belén, Marta Collado, Roser Maimo e Mireia Gómez.
GOLES: 1-0, min. 6 Antía; 2-0, min. 25 Dani Sousa.
ÁRBITROS: Colexiados, Calleja Rubio e Darriba Villamor. Amonestaron con cartón amarelo á futbolista do Poio Pescamar Dani Sousa.
INCIDENCIAS: Partido disputado no Pavillón Príncipe Felipe de Pontevedra correspondente á novena xornada do Grupo B da Primeira División do Fútbol Sala Feminino da RFEF.
O RESUMO DO PARTIDO, NA CANLE EN YOUTUBE DO POIO
