A ocasión viña que nin pintada. O FSF Móstoles co partido adiado, e as xogadoras que adestra Manu Cossío tiñan como rival ao faroliño vermello. O Poio Pescamar viaxou disposto a subir na táboa e conseguino. As galegas venceron 2-4 ao Joventut d’Elx FS e son terceiras.
Conste que de arranque as ilicitanas deron algún aviso. Pero aí estaba Caridad para poñer orde. O primeiro gol non se fixo esperar. Foi un saque de curruncho no que Ana Rivera centraba para que Dani Sousa rematese coa testa o 0-1.
O partido empataríase a cinco do final da primeira parte por mor dun tanto en propia porta de Luci que buscaba despexar o esférico e rematou por anotar gol pero na súa portaría (1-1). A un minuto do descanso Anna Escribano volvía a pór por diante ao Poio Pescamar (1-2).
Logo do paso por vestiarios as galegas buscaron aumentar unha renta que era curta. Atopouse cun rival que lonxe de parecer colista, prantoulle cara e fixo traballar a Caridad. Así e todo, a calidade de Dani Sousa que metía un balón a Irene, facían que o conxunto galego aumentase a fenda ata o 1-3.
Chegarían as conserveiras a poñerse cun 1-4 a favor cun tanto no 27 de Luisa Mayara. E case ao remate e logo de optar polo xogo de cinco, as locais anotaba un gol por medio de Claudia no 39 que colocaba no electrónico o 2-4 definitivo.
FICHA TÉCNICA
2) JOVENTUT D’ELX: Raquel; Morote, Judti, Nekane e Poveda – quinteto inicial -. Tamén xogaron: Cárol, Claudia, Bet Carrasco, Eli, Romina, Paula e Peque.
4) POIO PESCAMAR: Caridad; Irene, Luci Gómez, Dani Sousa e Ana Rivera – quinteto inicial -. Tamén xogaron: Julia Dupuy, Luis Mayara, Anna Escribano, Martita e Agostina Chiesa.
GOLES: 0-1, min. 5 Dani Sousa. 1-1, min. 15 Luci (propia porta). 1-2, min. 19 Ana Escribano. 1-3, min. 30 Irene. 1-4, min. 37 Luisa Mayara. 2-4, min. 39 Claudia.
ÁRBITROS: Andreo Martínez e Reig Miralles. Amosaron cartón amarelo a Morote no cuadro local do Joventut D’Elx.
INCIDENCIAS: Partido correspondente á 14ª xornada da Primeira División do Fútbol Sala Feminino da RFEF. Pavillón de La Esperanza.
