A primeira saída do ano do Poio non foi a deseada. Tan só levaban unha derrota fóra da casa, na primeira xornada en Burela, pero catro meses despois, o Alcorcón goleou con claridade (4-0) cun hat-trick da internacional Vane Sotelo e un tanto da tamén internacional Irene Samper. Este resultado provoca que as alfareiras ocupen a cuarta praza, que dá acceso ao playoff polo título.
O choque foi moi equilibrado no primeiro acto, pero no que o acerto na finalización das locais marcou o devir do segundo. Unhas e outras optaban por presionar con intensidade a saída de balón rival e buscaban plantarse con perigo ante a área rival.
O único gol dun competido e equilibrado primeiro tempo anotábao a ourensá Vane Sotelo de disparo cruzado desde preto de dez metros a dous minutos da conclusión do primeiro acto. O Poio tentou reaccionar nas no últimos intres do primeiro período, pero sen acerto nos metros finais.
Tras o descanso, as dinámicas non cambiaron en demasía. Todo se decidiu nos minutos finais. De novo a galega Vane Sotelo, esta vez aos catro minutos do segundo acto, conseguía ver porta tras unha gran xogada persoal que permitía ao Alcorcón ampliar a súa renda.
Co marcador favorable o Alcorcón optaba por contemporizar o seu xogo, ante un Poio que co paso dos minutos víase obrigado a correr riscos sobre a cancha ata acabar recorrendo ao xogo de cinco no tramo final. A falta de catro minutos para o final e con Iria Saeta como porteira – xogadora, dous erros á hora de tentar enlazar xogadas de ataque terminaron en goles, a porta baleira, asinados de novo por Vane Sotelo e Irene Samper.
Con todo, as galegas dispuxeron de dous dobres penaltis para maquillar o marcador. Clara lanzou desviado e Iria Saeta topouse cunha boa atallada de Ronsel, nun disparo que tamén tocou no poste. Simplemente, non foi o día das conserveiras.
Así pois, as rojillas, suman por primeira vez nesta campaña dúas derrotas seguidas e caen ata o quinto posto con 32 puntos. O obxectivo de entrar ao playoff está a un partido de distancia con case toda a segunda volta por disputarse. Na próxima xornada, as galegas reciben na Seca ao Penya Esplugues, sétimo clasificado con 25 puntos.
FICHA TÉCNICA
ALCORCÓN: Ronsel; Aída, Carmen Alonso, Irene Samper e Vane Sotelo (quinteto inicial). Tamén xogaron, Paula, Ballesteros, Pipi, Mireia, Cintia e Ronsel Canteiro.
POIO: Silvia; Cárol, Clara, Iria Saeta e Anna Escribano (quinteto inicial). Tamén xogaron, Ana Rivera, Mirian, Dani Sousa e Irene García.
GOLES:
1-0, min. 18 Vane Sotelo
2-0, min. 24 Vane Sotelo
3-0, min. 35 Irene Samper
4-0, min. 37 Vane Sotelo
TARXETAS: Resultaron amoestadas con cartolina amarela Ana Rivera no Poio e Vane Sotelo e Irene Samper no Alcorcón.
INCIDENCIAS: Pavillón Os Cantos. Ao redor de 200 espectadores.
