O soño do play-off complícase para o Poio Pescamar. As pontevedresas desprazáronse na quinta xornada para competir contra o Torreblanca Melilla e sufriron unha derrota a domicilio 5-2. Con este resultado o Poio Pescamar colócase na cuarta praza, xusto por detrás do seu rival de hoxe.
Os primeiros compases do partido facían prever un encontro igualado, pero o cadro local reaccionou. O curto plantel das melillenses non foi obstáculo para o seu xogo, e non tardaron en facerse co partido. Todo apuntaba un duelo de poder a poder.
O Poio golpea primeiro
O duelo comezou cun intercambio de ocasións, con dous equipos loitadores xerando perigo nas dúas áreas. Nos primeiros minutos, o Poio Pescamar parecía o conxunto mellor preparado, algo evidenciado pola ofensiva de Ana Rivera.
As galegas anunciaban o gol, e este caeu finalmente no minuto nove da man de Antía, que se librou de Bía e disparou sen que Sara Soares puidera frear o balón.
As xogadoras que adestra o técnico Manu Cossío situábanse xa por diante, pero pouco durou a alegría no banco das pontevedresas. En menos dun minuto, o cadro local respostou cun tanto de Emily Marcondes, quen se perfilaría como unha xogadora absolutamente fundamental ao longo do partido. O Torreblanca Melilla igualaba o partido coa vaselina da brasileira.
No bando visitante, Ana Rivera seguía sendo a protagonista do ataque, pero sen sorte ante a meta rival. Pola contra, Emily Marcondes facía saltar as alarmas galegas e foi responsable do segundo gol, que cedeu a Lydia cunha asistencia poñendo o 2-1.
Cos ánimos de verse xa por riba, as locais seguiron dominando o encontro ante un Poio que non sabía como reaccionar. Así chegou o terceiro gol da tarde, de novo, obra de Emily Marcondes. Desta vez, a brasileira do Torreblanca Melilla recibiu de costas e, outra vez, cunha vaselina superaba a Caridad García.
O cadro local optou entón por un xogo de cinco, evitando que os intentos de gol do Poio Pescamar subiran ao marcador. Porén, Luci non desaproveitou a súa oportunidade ao filo do descanso, anotando o 3-2 cun disparo afastado.
O Torreblanca asegura a vitoria
Na segunda metade o ataque dos dous equipos diminuíu, pero non o fixo a intensidade. O Torreblanca Melilla seguía confiando en Emily Marcondes como a estrela do seu equipo, mentres que as galegas do Poio Pescamar buscaban a súa oportunidade de iniciar a remontada.
Con todo, a ilusión das pontevedresas esfumouse co cuarto gol local, unha asistencia de Emily Marcondes desde a banda dereita, deixando que Bía empurrara o balón superando a Silvia.
Cando o encontro semellaba xa pechado, o equipo melillense aproveitou unha última ocasión para aumentar o seu colchón respecto ao Poio Pescamar. A cinco minutos do pitido final, Manu Cossío arriscou e colocou sobre a pista ás súas futbolistas apostando polo xogo de cinco. Tocoulle a Irene exercer o papel de facer de porteira xogadora, pero nada disto impediu a vitoria local.
Desde a súa metade do campo, Sara Soares anotaba o 5-2, sentenciando finalmente o encontro.
Podes revivir o partido completo dándolle ao play!
FICHA TÉCNICA
TORREBLANCA MELILLA: Sara Soares; Fernanda, Bía, Emilly e Lydia -quinteto inicial-. Tamén xogaron: Julia e Jacke.
POIO PESCAMAR: Caridad; Luci, Clara, Dani Sousa e Ana Rivera -quinteto inicial-. Tamén xogaron: Antía, Irene, Miriam, Silvia (segunda portera), Chiesa e Dupuy.
GOLES: 0-1 Antía (min. 9); 1-1 Emily Marcondes (min. 10); 2-1 Lydia (min. 14); 3-1 Emily Marcondes (min. 15); 3-2 Luci (min. 18); 4-2 Bía (min. 29); 5-2 Sara Soares (min-35).
ÁRBITROS: Cañas Mañas e Quintero Carrión, do colexio castelán – leonés e andaluz respectivamente. Amosaron tarxeta amarela ás futbolisas Julia e Bía do Torreblanca Melilla e Antía pola banda do conxunto do Poio Pescamar.
INCIDENCIAS: Partido correspondente á quinta jornada del Subgrupo D de la Primera División Nacional Femenina de Fútbol Sala da RFEF.
