O Poio Pescamar busca chegar á fase polo título na mellor forma posible, e o partido desta fin de semana será unha proba para medir o seu nivel. As galegas reciben o sábado 20, ás 18:30, ás líderes do Grupo A, o Futsi Atlético.
Este encontro recupera o programado para xornada 15, e enfrontará a dous dos mellores equipos na máxima categoría do futsal español. Sen dúbida, será un duelo rifado e intenso, pero sobre todo un espectáculo de fútbol sala.
Duelo do Poio polo máis alto
A el, o Poio Pescamar chega na segunda posición matematicamente, xa que acumula 35 puntos, dous menos que o Roldán, terceiro clasificado, pero xogou un partido menos. As pontevedresas acumulan once vitorias, dous empates e dúas derrotas.
Na última xornada, as conserveiras non foron capaces de afianzar a vitoria e deixaron escapar dous puntos ante o Penya Esplugues.
Con todo, ao longo da tempada, as galegas de Cossío demostraron o que valen para estar no máis alto, e esta será unha oportunidade para medrar ante a adversidade.
O Futsi Atlético leva en 15 xornadas 13 vitorias e dous empates, sendo o único equipo invicto do seu grupo, e da competición xunto ao Pescados Rubén Burela.
Unha desas vitorias foi ante o Poio Pescamar, cunha goleada 6-1 no partido de ida. Cun resultado similar, o Futsi xogou a última xornada axendada, contra o Teldeportivo, ao que gañou por un 6-0.
Esta será a última bala do Poio, que xogará coas madrileñas o último partido da primeira parte da competición, e o fará co factor casa a favor.
