O Poio Pescamar estreaba segunda fase en casa e ante un equipo con moita rivalidade. O Torreblanca Melilla chegaba á Seca cun posto máis que as galegas e con Marcio Santos, ex adestrador das vermellas, no banco.
O primeiro duelo desta loita polo título saldouse cun empate 1-1 moi merecido, despois dun encontro rifado e competido na Primeira División.
O Poio tivo as de gañar na primeira parte
As primeiras xogadas estiveron marcadas por dous nomes propios: Soares e Sousa. As futbolistas mantiveron un pulso sobre a pista de A Seca na área das visitantes, que marcaba a tónica igualitaria de todo o partido.
As opcións sucedíanse e chegaban a partes iguais para Poio Pescamar e Melilla, polo que Caridad tivo que empregarse a fondo na meta local e foi fundamental para manter o marcador rival a 0. Os primeiros dez minutos, frenéticos, movían o balón de lado a lado da pista, pero o gol resistíase. Luci, Ana Rivera e Dani Sousa amezaban ao Melilla, pero a porteira rival saía airosa das asccións ofensivas vermellas.
O primeiro tanto do partido chegaría finalmente da man de Sousa, que despois de moito insistir batía á gardameta melillense desde a súa metade do campo tras un robo de balón (1-0). A falta de trinta segundos para a fin da primeira parte, as galegas poñíanse por diante.
O encontro igualouse na segunda metade
O descanso chegou co Poio por diante pola mínima e un partido completamente aberto que debería decidirse na segunda parte. Despois do tempo de pausa, as vermellas non baixaron o ritmo para asegurar a vantaxe conseguida. No bando rival, as xogadoras tamén aumentaban a presión para chegar ao empate e case o conseguiron co disparo de Marcondes.
No primeiro minuto desde a reanudación, as locais tiveron tres ocasións de anotar fronte a dous das visitantes, mostra da igualdade que reinaba sobre A Seca.
Con todo por gañar, Santos optou polo xogo de cinco con Fernanda como porteira – xogadora, e apostando ás ofensivas para arrebatarlle a vitoria ao Poio. Este cambio de sistema deu resultado, xa que cun lanzamento de Emily chegaba o 1-1. O seu disparo dirixido á escuadra dereita entrou sen que Caridad puidera frealo, e igualando o partido que xa entraba na súa fase final.
Ante o golpe das visitantes, Cossío solicitou tempo morto e copiou o debuxo do adestrador rival, apostando tamén polo xogo de cinco con Irene como porteira – xogadora, para recuperar a vitoria. Finalmente, os intentos locais por recuperar a vantaxe non deron froito e o primeiro partido desta segunda fase rematou cun xusto empate.
O Poio Pescamar segue en plena loita polo título da máxima categoría do fútbol sala español. A seguinte cita das vermellas tampouco será nada doada. As pontevedresas visitan ás tamén galegas do Pescados Rubén Burela, un equipo imparable e que ven de vencer ao Ourense Envialia na primeira xornada. O duelo galego celebrarase en Vista Alegre na fin de semana do 3 de abril.
FICHA TÉCNICA
1) POIO PESCAMAR: Caridad; Clara, Lucía, Ana Rivera e Dani Sousa – quinteto inicial -. Tamén xogaron: Chiesa, Antía, Julia Dupuy, Miriam e Irene García.
1) TORREBLANCA MELILLA: Sara Soares; Emilly Marcondes, Julia, Lydia e Bía – quinteto inicial -. Tamén xogaron: María Soto, Jacke, Desi, Fernanda e Fabi.
GOLES: 1-0, min 20, Dani Sousa. 1-1, min 39, Emily Marcondes.
ÁRBITROS: Carreira Romero e Ferrero Carballal. Recibiron tarxeta amarela Bia e Fabi, así como o delegado do Torreblanca Melilla e Antía, Luci e Irene García, no Poio.
INCIDENCIAS: Partido correspondente á 1ª xornada do Grupo C da Primeira División Nacional Feminina de Fútbol Sala RFEF celebrado no pavillón de A Seca.
