O único representante galego na segunda categoría do fútbol feminino nacional, o PM Friol, loitará a partir da fin de semana do 20 e 21 de marzo pola permanencia na Reto Iberdrola. Os conxuntos rivais das futbolistas do conxunto lucense nesta segunda fase pola permanencia serán: Seagull Badalona, Athletic B, Zaragoza CFF, RCD Espanyol e Collerense.
Tal e como informa a Real Federación Galega de Fútbol, o colectivo lucense rematou a primeira fase cunha derrota ante un dos galos da categoría, o Atlético de Madrid B, e ocupando a sétima posición no Grupo Norte A. Deste xeito, o conxunto galego buscará acadar a salvación nunha segunda fase que promete fortes emocións.
Ata o de agora, nesta Segunda División do fútbol feminino os equipos estaban divididos en Grupo Norte A, Grupo Norte B, Grupo Sur A e Grupo Sur B. A partir da fin de semana do 20 e 21 de marzo de 2021, os grupos pasarán a ser Norte C e Sur C e Norte D e Sur D. Os grupos C serán os que xoguen a fase polo título, mentres que os D disputarán a fase pola permanencia.
Nesta segunda fase da Reto Iberdrola, os grupos Norte C e Sur C compoñeranos os catro primeiros equipos clasificados nos seus respectivos subrgupos.
O Friol debe evitar se un dos catro últimos do seu grupo
Na fase pola permanencia, na que estará o PM Friol, estarán os equipos que ocuparon do quinto ao último posto de cada subgrupo na primeira fase, configurando o Grupo Norte D e o Grupo Sur D.
Os equipos que participaron no subgrupo A enfrontaranse, a dobre volta, aos que participaron no subgrupo B non podendo, en ningún caso, enfrontarse aos equipos que participaron no seu mesmo subgrupo da primeira fase.
Configúrase, por tanto, nun total de 8 a 10 partidos en 10 xornadas. Os catro últimos clasificados de cada grupo descenderán á Primeira División Nacional.
Así, os rivais do PM Friol nesta segunda fase pola permanencia serán o Seagull Badalona, Athletic B, Zaragoza CFF, RCD Espanyol e Collerense.
