O Pescados Rubén Burela FS segue facendo historia. Aos títulos de campioas de Copa da Raíña, da Supercopa e da Copa de Galicia hoxe completaron a vitrina coa consecución do título de Liga diante de todo un Futsi Atlético Navalcarnero. O reinado das da Mariña parece que vai para longo no fútbol sala feminino español.
As Guerreiras Laranxas puxeron o broche con pleno esta tempada, sumando o seu noveno galardón consecutivo coa reválida do título de liga, para subir a cuarta á vitrina mariñá.
O conxunto que adestra o dúo de técnicos conformado por Julio Delgado e Lucas brillou na segunda parte da final de play-off de Torrejón de Ardoz para dar a volta á vantaxe de Futsi Atlético Navalcarnero de 2-0, con apertura de Dany e triplete da de Neda, que pechou Cami co definitivo 2-5 a tan só 1 segundo da bucina.
O Clásico do futsalfem español tivo un inicio equilibrado e aínda que a posesión e as recuperacións eran das galegas, foi Futsi Atlético Navalcarnero o que atopou a rede primeiro, con Ju Delgado tras aproveitar Lora un erro de pase galego, no 9.
Tan só dous minutos despois Ari, asistida por Becha, subiu o 2-0. Con máis de sete minutos para o descanso, as de Andrés Sanz subiron a quinta falta. Dispuxo de dobre penalti Jane no 16, pero saíu Belén de Uña para desartellalo. As de Julio Delgado, nunha boa dinámica na recta final da primeira parte, non puideron reducir distancias. E así se chegou ao descanso cun 2-0 para as madrileñas pero moitos minutos por diante como para ter garantías de nada, e menos nunha final entre dous grandes conxuntos.
A remontada do Burela
Logo do paso por vestiarios, as Guerreiras Laranxas regresaron ao parqué do Jorge Garbajosa exercendo unha gran presión e así, en tan só dous minutos, grazas ao seu xene gañador, deron a volta ao electrónico.
A estratexia outorgoulles o primeiro no 25, con saque de esquina de Cami e disparo cruzado de Bea Mateos, rematado por Dany.
De novo o balón parado volveu dar froitos ás futbolistas que adestra Julio Delgado, con firma de Ale de Paz, asistida de tacón por Dany. A de Neda estivo moi oportuna segundos despois para volver ver portería e poñer ás mariñás por diante, cun rexeite de Belén ante Leti Cortés.
A gardameta Jozi aguantou o tirón do Futsi
Jozi mantivo a salvo a renda galega do Burela no 29 ante Becha e no 32 Ale de Paz asinou o seu hat-trick cunha rápida recuperación e asistencia de Jane.
Volveu aparecer a 3 madrileña sobre a rede mariñá, o pau evitouna. Con 7 minutos, o bonus de faltas caeu do lado burelista, pero soubo como reaccionar.
No 37, o conxunto do Futsi Atlético Navalcarnero foi a pola remontada tirando do xogo de cinco para batere unha e outra vez coa solidez defensiva do Pescados Rubén Burela FS, que selou o definitivo 2-5 a tan só 1 segundo, con Cami como autora dese quinto gol que desatou a euforia das campioas.
A viveirense Lara Balseiro recolleu o galardón de campioas de mans do vicepresidente da RFEF, Pablo Lozano.
FICHA TÉCNICA
2) FUTSI ATLÉTICO NAVALCARNERO: Marta Balbuena, Ari, Leti, Ju Delgado e Ame Romero – quinteto inicial – Tamén xogaron: Anita Luján, María Sanz, Lora, Becha, Irene, Belén de Uña, Laura
5) PESCADOS RUBÉN BURELA FS: Jozi, Dany, Peque, Cami e Ale de Paz – quinteto inicial – Tamén xogaron: Jane, M. Cortés, Luísa Mayara, Bea Mateos.
GOLES: 1-0, minuto 9, Ju Delgado; 2-0, minuto 11, Becha; 2-1, minuto 25, Dany; 2-2, minuto 26, Ale de Paz; 2-3, minuto 27, Ale de Paz; 2-4, minuto 32, Ale de Paz; 2-5, minuto 40, Cami
ÁRBITROS: Colexiados Carlos Rabadán, Pablo Delgado, Sara Gutiérrez e Lydia Guillem. Amonestarono polo Futsi Atlético Navalcarnero con cartón amarelo ás futbolistas: Ari, Leti, Becha. Mentres que polo Pescados Rubén Burela foron sancionadas con cartón amarelo Bea Mateos e Jane.
INCIDENCIAS: Partido final do play-off polo título de liga 2020-21 disputada no Jorge Garbajosa de Torrejón de Ardoz. Xunto ao presidente do Pescados Rubén Burela FS, Manuel Blanco, apoiaron as Guerreiras Laranxas desde o palco de autoridades o deputado de Deportes de Lugo, Efrén Castro, e o responsable de fútbol sala de RFGF, Pablo Prieto.
