O Pescados Rubén Burela FS cumpriu cunha cómoda vitoria na pista do pechacancelas, Xaloc Alacant FS ao que se impuxo 0-7. Este partido supón a terceira cita consecutiva que as Guerreiras Laranxas rematan coa portaría a 0.
Mentres as galegas, líderes, non coñecen a derrota neste curso 2020-21, as alacantinas non coñecen o sabor do triunfo. Ao final desta xornada 33 puntos separan as da Mariña (que seguen primeiras) do Xaloc Alacant FS, que segue a ocupar o faroliño vermello.
As Guerreiras encamiñaron moi axiña a cita. No minuto 9 de partido xa ían por diante cun 0-3. na segunda parte completaron a renda, reencontrándose co gol por partida dobre na continuación, e estando máis tallantes en defensa para neutralizar as escasas tentativas de chegadas alacantinas.
O Burela Pescados Rubén deixou pegada da súa superioridade no luminoso con tres dianas antes do ecuador do primeiro acto. Tras a apertura de Lara Balseiro antes do cumprirse o 2 de xogo, axiña chegou o 0-2, con Bea Mateos en conivencia con Dany, na pugna de recuperacións.
O Xaloc tentou sorprender á contra nun par de chegadas fulminadas por Jozi sen problema, que viviu a máis perigosa sobre a rede laranxa fronte a Lara Navarro, co 0-3 xa a recado nas arcas galegas, en propia porta de Angy.
Tiveron que facer fronte as pupilas de Julio Delgado en momentos certamente anárquicos. Leti, en estratexia, e Ale de Paz, de lonxe, dispuxeron das mellores ocasións para o cuarto, que se resistiu antes do descanso, cunha recta final na que Jozi despexou co puño fronte a Angy e máis tarde se tivo que aplicar ante Ortiz, co apoio da defensa a área.
Volveu dispoñer dun inicio moi efectivo o Burela Pescados Rubén no regreso. Tras os avisos de Elena Aragón, en disparo cruzado, e Dany en carreira, Bea Mateos (minuto 22) e Jane (minuto 24) aumentaron a renda ata o quinto.
Sandra Buzón releva a Jozi na portaría do Burela
Sandra mantivo a portería infranqueable con dúas perigosas de Poveda e Angy, sen moito máis traballo. Insistiron e insistiron, armándose de paciencia as mariñás, para referendar o claro triunfo. Dany, recibindo ao segundo pau de Bea, e Jane, nun grande entendemento con Elena Aragón, subiron o definitivo 0-7 entre o 34 e o 36.
FICHA TÉCNICA
XALOC ALACANT FS: Vero Villa, Lara Navarro, Ortiz, Poveda e Angy – quinteto inicial -. Tamén xogaron: Maite, Elena Sanchís, More, Lorena Martínez e Toñi.
PESCADOS RUBÉN BURELA FS: Jozi, Dany, Lara Balseiro, Bea Mateos e M. Cortés – quinteto inicial -. Tamén xogaron: Elena Aragón, Cami, Luísa Mayara, Ale de Paz, Jane e Sandra Buzón.
GOLES: 0-1, minuto 1, Lara Balseiro, 0-2, minuto 3, Bea Mateos; 0-3, minuto 9, Angy ( p. p.); 0-4, minuto 22, Bea Mateos; 0-5, minuto 24, Jane; 0-6, minuto 34, Dany; 0-7, minuto 36, Jane.
ÁRBITROS: Reig Miralles e Sanclemente Elvira. Polo Pescados Rubén Burela viu cartón amarelo a futbolista Luísa Mayara no minuto 22.
INCIDENCIAS: Partido correspondente á xornada 17 de Primeira División Feminina da RFEF disputado no Pitiu Rochel de Alacante.
