A 23ª xornada competitiva da Liga Feminina Endesa traía un encontro entre Durán Maquinaria Ensino e Valencia BC que terá que ser aprazado. O equipo dirixido por Rubén Burgos ven de detectar novos casos positivos en COVID-19, polo que non poderá viaxar a Lugo para disputar o encontro.
Ambos equipos están xa traballando en acordar unha nova data para disputar o duelo. Nun principio, este estaba previsto para o xoves, 28 de xaneiro, no Pazo dos Deportes lucense.
Polo de agora, este é o único partido que teñen pendentes as de Carlos Cantero. Un encontro moi importante e nada doado, xa que de disputarse esta semana, enfrontaría ás galegas, na sexta posición, coas valencianas, na segunda.
O Valencia acumula varias semanas sen competir
As que serán visitantes neste encontro teñen seis puntos máis, con outros dous partidos adiados. Un deles, o correspondente á xornada anterior, contra o SPAR Girona. As xogadoras do Valencia BC non puideron competir debido aos cambios de datas da Eurocup, que por mor da pandemia rematou o pasado venres en Valencia.
E na xornada anterior a esa, a vixésima, as taronjas tampouco xogaron, ao ter que aprazar o seu partido co Embutidos Pajariel Bembibre por ter casos positivos en COVID-19 nas súas filas. Desta forma, xa son tres semanas nas que o Valencia BC non participará na competición regular.
O Ensino terá máis de dúas semanas para preparar o seguinte partido de Liga
Co adiamento deste duelo, as lucenses disporán de medio mes para preparar o seguinte encontro ligueiro. Será o 11 de febreiro, ás 20:30 horas, visitando ao Embutidos Pajariel Bembibre, o colista da táboa.
Este obrigado parón pode servir para chegar en mellor forma ao seguinte reto e coas xogadoras con molestias recuperadas, pero tamén pode supoñer un contratempo, ao frear o bo momento deportivo no que se atopa o equipo.
As lucenses do Ensino levan unha racha de tres partidos consecutivos con vitoria, logrados cun xogo coral coordinado e moita efectividade e acerto baixo o aro. Algo no que coincidían xogadoras e adestrador á fin da pasada xornada.
