Despois do parón forzoso ao ver cancelado o seu encontro contra o Penya Esplugues, por un positivo detectado entre as catalás, o Ourense Envialia FS volve ao terreo de xogo. Será ante o CD Leganés FS Masdeporte, o sábado, 28 de novembro, ás 19:30 horas na sétima xornada de Primeira División de Fútbol Sala.
Esta atípica tempada está afectando á regularidade do Ourense, que viuse obrigado a deter a competición en dúas ocasións por casos relacionados coa COVID-19 (un propio e outro do rival) e tras unha xornada na que tocaba descansar.
Así, chegan a esta sétima xornada con tres partidos disputados, dos cales só saiu vitorioso dun, contra o Teldeportivo, e tendo aínda que recuperar os encontros fronte ao Viaxes Amarelle da primeira xornada e contra o Penya Esplugues da sexta. Da súa parte xoga o factor da volta de Judith Pedreira á convocatoria, despois de varios partidos alonxada da competición.
Pola súa banda, o rival das ourensás tamén disputou soamente tres duelos e veñen da semana de descanso. Con todo, a sorte caeu máis do seu lado e duplican os puntos do Ourense, ao gañar os partidos contra o Viaxes Amarelle e o Teldeportivo. De todas formas, aínda teñen que xogar dous encontros aprazados contra dous rivais galegos: o Poio, correspondente á primeira xornada, e o Cidade de As Burgas da segunda.
Despois de dúas semanas sen xogar, as xogadoras ourensás non poden fallar ante o quinto clasificado. Repetir a vitoria inaugural do 2020 ante o mesmo rival será vital para poder así aumentar as súas posibilidades de colarse na parte alta da clasificación. Algo cada vez máis importante, a medida que se achega o ecuador da competición.
1DIV // J.07 // PABELLÓN LA FORTUNA – 28/11 · 19:30H // @CDLeganesFS_Fem · OURENSE ENVIALIA FSF
Volvemos a la competición con la ilusión y las ganas por la nubes.
¡Vuelve @JudithPedreira a la convocatoria! ¡Felices!
¡Imos ó lío!#ourensEnvialia #ubuntu #imosOlio #futsal pic.twitter.com/VW797PISi7
— Ourense Envialia FSF (@OUenvialiaFSF) November 26, 2020
