A Penya Esplugues recibía un 3-0 do Ourense Envialia esta fin de semana. Foi na disputa do partido que tiñan pendente de xogar desde a sexta xornada, momento no que o cruce foi aprazado. As galegas sumaron outro +3 que as sitúa no grupo de cabeza entre os catro primeiros conxuntos no grupo A da Primeira División Feminina de Fútbol Sala da RFEF.
As de Morenín xogaron o partido no Pavillón Municipal de Ribadavia. Marcaron os goles que outorgaron o triunfo para o Ourense Envialia Judith Pedreira (e dúas ocasións) e Marta Figueiredo.
Rematar a primeira volta na cuarta posición fala dunha recuperación clara das ourensás que non iniciaron o curso 2020-2021 cos mellores resultados. Sen embargo, mentres outros clubs galegos como o Viaxes Amarelle ou o Cidade de As Burgas tentan sacudirse a presión dos postos baixos, as de Morenín xa respiran sen tanta presión na zona alta da táboa clasificatoria.
Non é un rival doado a Penya Esplugues polo que o triunfo das ourensás ten aínda maior importancia. A súa liña de resultados é ascendente e pouco a pouco fanse máis regulares. Sobre todo as galegas foron un bloque máis sólido sobre o campo nos momentos do partido nos que era crucial selo.
Galegas e catalás ofreceron unha primeira metade moi igualada sobre a pista. Coa Penya Esplugues poñendo en algunha ocasión en dificultades a Vane Barberá. Pero o partido mudou na segunda parte.
Custou abrir a lata dos goles pero á volta do descanso Judith Pedreira anotaba para as locais dous tantos moi seguidos anotados nos minutos 23 e 25 que colocaban o partido de cara para o Ourense Envialia. De feito, non andivo lonxe de anotar o terceiro cun tiro lonxano. Tentaronno as catalás co xogo de cinco sen éxito. Remataba de decantar o partido Marta Figueiredo asinando o 3-0 no minuto 38 de xogo. Un remate espectacular que finiquitou as oportunidades para a Penya Esplugues.
Este resultado coloca ao Ourense Envialia na cuarta posición na táboa clasificatoria. Un bo xeito de rematar un ano deportivo marcado para todas as disciplinas polo extradeportivo: pola pandemia de COVID-19. que condicionou as vidas de todas as persoas, tamén na práctica deportiva.
A competición de Liga non regresarará até a fin de semana do 17 de xaneiro de 2021. Pero antes o conxunto ourensá estará atento á sorte que lle deparará o sorteo de Copa da Raíña que se celebra hoxe, luns 28 de decembro.
FICHA TÉCNICA
OURENSE ENVIALIA: Vane Barberá, Chiky, Marta, Jenny Lores e Iria Saeta – quinteto inicial -. Tamén xogaron: María, Laura Uña, Judith Pedreira, María Arias e Carmen.
PENYA ESPLUGUES: Raquel, Laia, Berta Velasco, Martita e Collado – quinteto inicial -. Tamén xogaron: Clara, Pilar, Celia, Irina Godó, Belén e Ruth.
GOLES: 1-0, min. 23: Judith Pedreira; 2-0, min. 25: Judith Pedreira; 3-0, min. 38: Marta Figueiredo.
ÁRBITROS: Carlos Martínez Torres e Francisco Javier Roldán Pérez, ambos do colexio galego. Amonestaron con cartón amarelo a Laura Uña nas locais e a Irina Godó nas visitantes.
INCIDENCIAS: Partido adiado correspondente á sexta xornada da Primeira División Feminina de Fútbol Sala da RFEF, disputado na pista do Polideportivo Municipal de Ribadavia.
