O Ourense Envialia tivo a oportunidade a pasada fin de semana de meterse entre os tres primeiros equipos da máxima categoría do futsal feminino español, pero finalmente non puido ser. Un acertado STV Roldán FSF impúxose ás galegas levándose os tres puntos que outorga o trunfo nesta competición (2-5).
No regreso ao seu templo, o pavillón dos Remedios, (un recinto deportivo que as ourensás non pisaban desde hai un ano), as de Morenín tiñan a tarefa de vencer a un rival directo na clasificación da Primeira División do Fútbol Sala. Finalmente, non foi así e as galegas quedan na cuarta posición cun total de 18 puntos no seu casilleiro.
A balanza decantouse en contra do Ourense Envialia
O partido comezou presentándose como un pulso entre iguais. Non foi ata o minuto 5 de partido cando se abriu o marcador, cun tanto de María a favor das locais aproveitando un envío en longo.
Esa foi a única xogada de gol que se puido ver no pavillón dos Remedios durante a primeira metade do duelo, no que ambos equipos loitaban por achegarse á meta contraria pero sen moita sorte, máis aló da xogada illada da ourensá.
O STV Roldán FSF, pola súa parte, creaba xogadas de perigo na zona de definición con roubos e competindo con instensidades nos tres cuartos. Pero as murcianas non eran quen de materializar as boas sensacións.
O panorama cambiou durante a segunda parte. Se a primeira caracterizouse pola sequía de goles, a segunda foi un festival de tantos.
Dous minutos despois da reanudación, Noelia Montoro poñía o primeiro para as visitantes, tras unha xogada de estratexia precedida dun saque de esquina a pase de Lola.
Instantes despois chegaría o segundo tanto do Roldán, desta vez con intervención directa de Lola, que superaba á cancerbeira local Vanesa Barberá. O encontro poñíase cada vez máis costa arriba para o Ourense Envialia, que encaixaba o terceiro gol dous minutos máis tarde, obra de Alba Gandía.
A falta duns 10 minutos para o pitido final, Marta de los Riscos ampliaba a renda visitante poñendo o cuarto no marcador, sen que as ourensás puideran facer nada para impedilo.
Ante esta situación, Morenín reorganizou ás súas cun xogo de cinco, con Iria Saeta asumindo o papel de porteira – xogadora. Uns cambios que xurdiron o efecto desexado, xa que no minuto 34 chegaba o segundo gol galego, asinado, nesta ocasión, pola futbolista local Judith Pedreira.
Porén, o partido remataría pouco despois dunha acción en contra do Ourense Envialia. A presión do STD Roldán FSF obrigaba ás galegas a retrasar a saída de balón, polo que a propia Judith Pedreira anotou en propia porta.
O duelo rematou con este 2-5 que deixa a murcianas e galegas a cinco puntos de distancia.
FICHA TÉCNICA
2) OURENSE ENVIALIA: Vanesa Barberá ; Chiky, Jenny Lores, Iria Saeta e Marta Figueiredo – quinteto inicial -. Tamén xogaron: Laura Uña, Judith, María Arias e María.
5) STV ROLDÁN: Cristina; Noelia Montoro, Marta Pelegrín, Ángela e Mariángeles – quinteto inicial -. Tamén xogaron: Marta de los Riscos, Alba, Andrea, Consuelo e Lola.
GOLES: 1-0, min. 5 María; 1-1, min. 22 Noelia Montoro; 1-2, min. 24 Lola; 1-3, min. 26 Alba Gandía; 1-4, min. 31 Marta de los Riscos; 2-4, min. 34 Judith; 2-5, min. 37 Judith (propia porta).
ÁRBITROS: Carreira Romero e Martínez Torres do colexio galego. Recibiron cartulina amarela Iria Saeta e Jenny Lores no conxunto do Ourense Envialia.
INCIDENCIAS: Partido correspondente á 14ª xornada do Grupo A da Primeira División Nacional Feminina de Fútbol Sala RFEF, disputado no Pavillón de Os Remedios de Ourense a porta pechada por mor das restricións vixente en Galicia. A Xunta decretou que os espectáculos deportivos se celebrarsen sen público ata nova orde para frear a cruva de contaxios da COVID-19 na nosa comunidade autónoma.
