O Ourense Envialia FS precisaba unha vitoria e así o fixo 4-6. Chegaba ao encontro coa metade de puntos que o seu rival, o CD Leganés FS Masdeporte, que contaba con seis puntos tras dúas vitorias. Un rival directo na Primeira División de Fútbol Sala, ao que agora o Ourense empata na clasificación.
A primeira parte estivo completamente dominada polo cadro visitante. O gol temperán das locais da man de Judith no minuto 7 non lle restou enerxía ás visitantes que loitaron polo encontro. As xogadoras de Morenín impuxeron o seu xogo, e lograron rematar o primeiro acto cun 1-4 que sentenciaba o partido. Un resultado abultado grazas aos tantos de Guti, dous seguidos de Andrea Feijóo e un a tres minutos da pausa de Carmen.
Á volta do descanso, o Ourense Envialia seguiu presionando e marcou aos poucos minutos o quinto gol, obra de Laura Uña. Porén, o Leganés subiu unha marcha e logrou anotar, deixando claro que non daba por perdido o partido. O gol de Chuli para as locais foi en seguida silenciado polo segundo tanto de Laura Uña, catro minutos despois.
As xogadoras do Leganés empurraron ata o final e lograron sumar dous goles máis, o último deles a dous minutos do final. Con todo, non foi suficiente para levarse os puntos, que viaxaron coas xogadoras de Ourense de volta a casa.
FICHA TÉCNICA
CD LEGANÉS FS MASDEPORTE: Luci Sánchez; Patry Montilla, Pipi, Puche e Guti – quinteto inicial -. Tamén xogaron: Chuli, Patri Blázquez, Yrezábal e Stone.
OURENSE ENVIALIA: Vane, Jenny Lores, Andrea Feijóo, Marta e Laura Uña – quinteto inicial -. Tamén xogaron: Carmen, Judith, María e Chiky.
GOLES: 1-0 min. 7 Judith; 1-1 min. 9 Guti; 1-2 min. 12 Andrea Feijóo; 1-3 min. 13 Andrea Feijóo; 1-4 min. 17 Carmen; 1-5 min. 23, Laura Uña; 2-5 min. 28 Chuli; 2-6 min. 32 Laura Uña; 3-6 min. 33 Stone; 4-6 min. 38 Guti.
ÁRBITROS: Mayo López e Panadero Díaz-Concha do colexio madrileño.
INCIDENCIAS: Partido correspondente á xornada sete da Primeira División do Fútbol Sala Feminino da RFEF.