O Ourense Envialia tiña esta sábado a súa oportunidade de volver a puntuar e non defraudou no pavillón de Os Remedios. Nun encontro igualado e cheo de goles, as galegas impuxéronse pola mínima ao FSF Móstoles, cun resultado final de 5-4 que deixa os tres puntos en Ourense.
As futbolistas de Morenín lograron retomar a senda da vitoria, despois de caer derrotadas en dúas ocasións polo Pescados Rubén Burela, tanto na competición regular como na Copa da Raíña. Con este resultado da sexta xornada, o Envialia da un paso adiante no grupo polo título.
Duelo rifado en Os Remedios
Este sábado dous equipos de similar nivel citáronse nos Remedios. Ourense Envialia e Móstoles son os últimos clasificados do grupo polo título, no que só os catro primeiros clasificados pasarán ao play off. Isto non impediu ver un gran partido de futsal na pista ourensá, cun festival de goles.
Ambos conxuntos comezaron o encontro cun sistema de xogo similar: agardar aos erros rivais para atacar. O ritmo de xogo tardou en arrincar, pero cando o fixo os dous equipos apostaron polas rotacións para manter a forma nun duelo que se prevía esixente no físico.
No cadro local, as galegas tiñan máis acerto nas combinacións en tres cuartos. Nunha delas, Jenny Lores estivo a piques de rematar un centro de Chiky. Pola súa parte, o Móstoles ameazaba constantemente a Vane baixo paos. A presión visitante converteuse nun gol, o primeiro da tarde, no minuto 16, obra de Celia ao aproveitar un pase por elevación e Chamorro.
O Móstoles buscaba manter a vantaxe prolongando as posesións, pero o Envialia subiu o ritmo de xogo para non quedar descolgado. O descanso chegou con derrota galega no marcador, pero non nos ánimos.
Á volta de vestiarios, o Envialia iniciaba a remontada
A pausa sentou ben ás xogadoras de Morenín, que volveron á súa pista coas enerxías renovadas. Aos cinco minutos da reanudación, Chiky sacábase da manga unha xogada persoal despois de robar o balón na metade da cancha, poñendo o empate no electrónico. O empate cheou de motivación ás locais, que seguiron presionando ata facer o segundo, desta vez anotado por Laura Uña desde o punto de penalti.
Non contentas coa distancia conseguida, o Envialia aproveitaba unha contra para ampliar a súa renda. Iria pasoulle o balón a María para que esta finalizase desde a frontal cun disparo raso pegado ao pao. O adestrador adversario optou desta vez por un xogo de cinco para ir a pola remontada. Pero a xogada non saiu ben e Iria aproveitou unha perda de balón para anotar a porta vacía o 4-1.
No banco rival non baixaban os brazos, e as visitantes reaccionaron con dous goles consecutivos, de novo grazas a Celia, transformando o marcador nun perigoso 4-3. Pero as ourensás xa tiñan encamiñada a vitoria e non ían deixar escapar os tres puntos. Nas filas do equipo galego Iria erixiuse como a encargada de defender o trunfo, anotando o quinto gol de cabeza tras un envío longo de Vane.
O Móstoles seguiu loitando por rascar puntos nos Remedios, marcando desde dentro da área cun disparo de Alicia case ao borde do final. A vitoria local estaba en perigo, pero o Ourense Envialia soubo sufrir nos minutos finais para afianzar a tan necesaria vitoria.
Revive aquí o partido!
FICHA TÉCNICA
OURENSE ENVIALIA: Vane; Chiky, Iria Saeta, Jenny Lores y Laura Uña (cinco inicial). Tamén xogaron: Susana, María, Carmen e Paula.
FSF MÓSTOLES: Ari; Patri Chamorro, Inma, Celia y Benete (cinco inicial). Tamén xogaron, Sara Santos, Shiori e Desi.
GOLES: 0-1 (min. 16 Celia), 1-1 (min. 25 Chiky), 2-1 (min. 30 Laura Uña (penalti)), 3-1 (min. 31 María), 4-1 (min. 32 Iria), 4-2 (min. 34 Celia), 4-3 (min. 35 Celia), 5-3 (min. 36 Iria), 5-4 (min. 38 Alicia Benete).
ÁRBITRAXE: F. Miguel Velasco e R. Miguel Velasco (col. castelán leonés). Recibiu amarela Sara Santos, do Móstoles, e Chiky, do Envialia.
INCIDENCIAS: Partido correspondente á sexta xornada do grupo C de Primeira División da RFEF disputado en Os Remedios (Ourense).
