O BAXI Ferrol comeza mañá a preparación da próxima tempada na que vai competir na liga Challenge coa intención de retornar á máxima categoría do baloncesto español.
O cadro ferrolán conta cun proxecto moi renovado, xa que só continúan da pasada campaña a americana Jenna Allen e a valenciana Irene Garí. A elas únese o retorno das arxentinas Andrea Boquete e Julieta Mungo, así como as incorporacións da cántabra Marta Gómez, a catalá Claudia Soriano, a alacantina Ángela Mataix, a malagueña Patricia Soler, a serbia Nevena Dimitrijevic, a finlandesa Marianne Kalin e a canadense Jéssica Fequiere.
Tamén seguirá en dinámica do primeiro equipo a canteirá Sonia Bra, aínda que nestes momentos está a se recuperar dunha intervención cirúrxica nun xeonllo.
Á fronte do equipo do BAXI Ferrol continúa o técnico Lino López e incorpórase para levar a cabo a preparación física Joan Fuster. Tamén segue a psicóloga Patricia Gómez da Torre.
Na xornada de hoxe, o bloque de xogadoras someterase aos recoñecementos técnicos durante a mañá, mentres que, pola tarde, de 18.00 a 20.00 horas, exercitaranse no pavillón da Malata.
A campaña de abonados supera as 800 persoas socias do BAXI Ferrol
Por outro parte, segue aberta a campaña de abonados para poder renovar ou darse de alta no club departamental. Polo momento, renovaron o seu abono co BAXI Ferrol 713 persoas, mentres que se produciron 89 altas, o que fai un total de 802 persoas. Todas as persoas interesadas poden pasarse pola Taberna Arauxa, no Cantón de Molins 6, de martes a domingo de 12.00 a 22.00 horas. Tamén se poden facer as xestións a través do correo electrónico abonadosuniferrol@gmail.com.
