A xornada dominical na Liga de Honra B Feminina estará marcada en Galicia polo encontro entre o Muralla Galicia Emerging e o C.P. Les Abelles, nun partido que se celebrará as 12:00 horas no Gregorio Pérez Rivera (As Pedreiras).
A cita lucense está enmarcada dentro da xornada tres da competición. As locais, que dirixen o dúo conformado por Jos Portos e Rogelio Sabio, membros do staff técnico da Federación Galega de Rugby (FGR), ocupan o sétimo lugar da clasificación. O balance do Muralla Galicia Emerging é de dúas derrotas, mentres que as visitantes son terceiras, cun balance de dúas vitorias. O encontro estará arbitrado por Miriam de la Rubia.
O adestrador, Jos Portos, explicaba a As Nosas, que pensa que é o que precisa traballar este o grupo de xogadoras: “Falamos de actitude”. Para o técnico galego o traballo de agora en diante pasa por “Concienciarnos de ir paso a paso, e plantar cara mellorando a actitude”.
Jos Portos, técnico do Muralla: “Temos que ir paso a paso, plantar cara e mellorar a actitude”
Vaticina Portos que ata o partido contra o XV Rugby Murcia (último clasificado e previsiblemente o rival co que xogarse a permanencia), “quédanos facernos fortes ser mellores xogadoras e avanzar un paso cada unha”.
Sobre o último cruce das galegas explicaba que a primeira parte “foi moi de ver que pasa”. Xa na segunda, logo da charla motivadora recibida no descanso, as xogadoras interiorizaron mellor a idea do corpo técnico. “Díxenlle que buscamos valentes no campo. No descanso fomos moi críticos por que pido actitude. Na segunda parte, perdemos, pero doutro xeito. Quedámonos con esta sensación”, apunta mirando cara a diante con esperanza o adestrador.
Jos Portos, técnico do Muralla: “O noso ensaio foi froito de 15 contactos. Temos algo dentro. Témolo que crer”
Como exemplo do rugby que teñen dentro as xogadoras do Muralla Galicia Emerging Jos Portos explicaba que o ensaio acadado polas súas pupilas foi “froito de 15 contactos. Temos algo dentro, temos que crérnolo”.
De cara ao futuro, Portos comenta que desde o corpo técnico quere “concienciar ao grupo de que temos máis dentro. E tamén temos que aprender a sufrir”.
O éxito deste grupo seguramente radique en que este grupo de xogadoras galegas emerxentes sexan quen de sacurdirse os complexos e medrar sobre o campo. Ser valentes, como apuntaba o seu técnico.
Tres baixas do Muralla fronte a CP Les Abelles
Para medir forzas co CP Les Abelles nas pedreiras, o Muralla Galicia Emerging conta con tres xogadoras que non poderán ser da partida. No adestramento do xoves, a pilier Gelu rachaba unha man. Haille que sumar que Iria ten un golpe nun xeonllo e que tamén perden a Loce para este encontro debido a que tivo que viaxar por motivos familiares. “Temos baixas pero completamos a convocatoria”, matiza Jos Portos.
Sobre o rival o técnico local destaca o feito de que “case xoga o ano pasado o ascenso. Vai ser un dos cocos”. Efectivamente, o conxunto visitante amósase moi sólido, con Martina Fernández terceira na clasificación de mellores xogadoras, con catro ensaios realizados e Igone Martín líder en puntos co pé, con 11.
Será unha dura proba para o conxunto local, que amosa unha tendencia positiva en canto a calidade de xogo pero que aínda ten que gañar en confianza.
Pero é que logo virá o AVIA Eibar Rugby Taldea, que “tamén é moi forte”, avisa Portos sobre o actual líder da táboa clasificatoria na División de Honra B Feminina. E despois tocará enfronatarse ao acabado de descender da Liga Iberdrola XV Hortaleza R.C. Así pois, non haberá rival pequeño nesta competición na que o Muralla aspira a manterse e a formar xogadoras.
Para seguir o partido Muralla Galicia Emerging vs Les Abelles Valencia en streaming, podes acceder á canle en YouTube do club lucense:
