O conxunto lucense do Muralla Galicia Emerging será o representante galego na División de Honra B de rugby. A categoría terá a partir deste ano formato de Liga a unha volta e dará acceso á máxima categoría: Liga Iberdrola. O obxectivo é manterse e actuar como club franquicia do rugby galego servindo para dar minutos e carga competitiva ás xogadoras emerxentes da nosa comunidade. Deste xeito, o salto á elite será menos abrupto.
O corpo técnico está encabezado por Jos Portos e Rogelio Sabio, membros do staff técnico da Federación Galega de Rugby (FGR). O tándem conta con contrastada experiencia e confía no grupo humano que dirixirán. “Estamos. É un grupo moi ameno, con ganas de aprender, de traballar e de mellorar. Agora ven a parte máis dura, chega a competición, pero temos un grupo fantástico, con ganas de traballar, con ilusión”, explicaba Jos Portos nunha entrevista concedida a As Nosas.
A plantilla conformouse coa idea de contar con xogadoras non só de Lugo, senón de diferentes puntos de Galicia, así hai xogadoras de Ferrol, A Coruña ou Lalín, por exemplo. A idea é que vai servir de equipo franquicia galego para dar saída ás deportistas que destaquen nesta disciplina e facerlles así máis doado o salto á elite estatal.
O Muralla RC acadou o ascenso logo de ter disputado en varias ocasións a fase de ascenso. O seu último subcampionato na Liga Galega deulles dereito a ocupar praza nesta nova competición.
Explicaban desde o club que “se ben se gañou deportivamente o dereito a figurar nesa nova División de Honor B, as dificultades para afrontar o proxecto fixeron que se exploraran vías alternativas, entre as cales xurdiu a posibilidade do amparo do proxecto co paraugas da Federación Galega de Rugby, interesada para o desenvolvemento do rugby feminino en Galicia en reter esa praza na división de prata estatal”.
Froito desta idea común, tras conversas coa FGR, “chegouse ao acordo de empregar a praza como franquicia do rugby galego, co fin de formar a xogadoras emerxentes dos diferentes clubes galegos que reforcen os adestramentos e plantel de xogadoras do Muralla, xunto con staff técnico da FGR encabezado por Jos Portos e Rogelio Sabio como adestrador de dianteira”, detallan desde o Muralla Galicia Emerging.
Quen son os rivais do Muralla?
Xunto co Muralla Galicia Emerging participarán na División de Honor B os conxuntos do Eibar RT, XV Hortaleza, ADI Industriales Las Rozas, Sant Cugat, BUC Barcelona, Les Abelles Valencia e XV Murcia.
Desde este mes de xaneiro e ata marzo xogarase a competición a unha soa volta. Posteriormente vanse disputar dúas semifinais que enfrontarán a 1º contra 4º e 2º contra 3º. Deses cruces sairán os conxuntos que optarán á final. O equipo gañador desde partido decisivo logrará o dereito a ascender á Liga Iberdrola. O último descende á categoría regional correspondente.
O primeiro partido das rapazas que adestran Jos Portos e Rogelio Sabio será o domingo 19 de xaneiro ás 12:00 horas no Estadio Gregorio Pérez Rivera (As Pedreiras), diante de ADI Industriales Las Rozas. O equipo técnico di que sairán a gañar.
_______________________________________________________________________
Le á entrevista a Jos Portos, adestrador do Muralla Galicia Emerging:
“Ímonos poñer nun escenario competitivo completamente distinto ao que están afeitas as xogadoras en Galicia. Por iso é importantísima a actitude”
