Dous dos equipos da zona alta da táboa na Primera División do Fútbol Sala Feminino da RFEF vense as caras esta fin de semana. O Poio Pescamar, segundo clasificado, recibe ao Melilla Sport Capital Torreblanca na Seca a partir das 18:30 horas de hoxe, sábado 13 de maio.
Unicamente tres partidos de liga regular quedan por diante e nos dous que as galegas teñen como locais, reciben a clubs confirmados para a disputa do play-off polo título. Hoxe é a quenda do Melilla Sport Capital Torreblanca, o seguinte será o Pescados Rubén Burela. Isto non significa que non haxa nada en xogo. Todo o contrario.
Este sábado (A Seca, 18:30h) as conserveiras aspiran a vencer ao conxunto adestrado polo galego Morenín (ex do Poio en dúas etapas) para manterse segundas e seguir pelexando o primeiro posto, coa intención de ter o factor cancha nas eliminatorias. En fronte, estará o conxunto do Melilla Sport Capital Torreblanca, que vai cuarto na clasificación con 60 puntos, dez menos cas vermellas.
Na volta á competición, tras o parón da Copa da Raíña, tocábanos un esixente mes de maio, que o Poio Pescamar iniciou cun espléndido triunfo en casa do Roldán a pasada semana, o quinto seguido. Nesta xornada, á parte da coñecida ausencia de Marta, volve ser baixa por lesión Dupuy.
Desde o club lembran á afección que aquelas persoas “que sacasen entrada para o anterior partido, contra o Ourense CF, poderán entrar mañá coa mesma. Ademais, para favorecer o fervor nas bancadas, volveremos facer sorteos de merchandising entre quen acuda con vestimentas vermellas. O equipo notou o alento da Marea Rojilla no pasado derbi fronte ás ourensás e queremos repetir sensacións positivas na Seca”, explican desde a entidade deportiva galega.
O Melilla Sport Capital Torreblanca, segundo os datos que ofrecen as estatísticas, está no seu mellor momento do curso. A pasada xornada venceron ao Teldeportivo (3 – 1) e certificaron matematicamente a súa clasificación á fase polo campionato.
Oito son os enfrontamentos consecutivos que enlazan sen perder, cedendo tan só dous empates e gañando tanto a Burela como a Futsi (as de Navalcarnero vingáronse eliminándoas en cuartos de final da Copa).
Dos seus 60 puntos, 39 sumáronos en casa e 21 lonxe dela. Nas súas filas, xogadoras do talento de Amandinha, recoñecida oito veces como a mellor do mundo, Bia, pichichi da liga con 31 goles, ou reforzos invernais do máis alto nivel como Nega. Non en balde, o persoal melillense conta con nove integrantes de Brasil, dúas arxentinas, dúas ucraínas e dúas españolas (as que máis tempo levan no club).
Na primeira volta, o Poio Pescamar vencía 0 – 2 no pavillón Javier Imbroda, o que significou ser o único equipo que, directamente, non perdeu na súa pista, así como a excepcional vez que quedaron sen marcar nun partido esta tempada.
Mirando máis atrás, a escuadra galega e a melillense enfrontáronse nas dúas campañas anteriores, desde que ascenderon a Primeira. Na Seca, venceron as conserveiras 5 – 4 hai un ano e empatamos 1 – 1 en 2021. Como visitantes, as galegas perderon 5 – 2 na primeira viaxe a Melilla, empataron 2 – 2 na 2021 / 2022 e, neste curso o triunfo foi para o Poio Pescamar.
