- Itziar Martínez: “É un soño para min poder competir ao máximo nivel cun club desta categoría”
- A primeira liña granadina de 25 anos chega procedente do Bolaños de División de Honra Oro
Xunto a Ania Ramos, o Mecalia Atlético Guardés incorpora tamén outro talento procedente da División de Honra Oro. Trátase de Itziar Martínez, unha primeira liña zurda, que vén de completar unha gran tempada co Bolaños, equipo manchego que finalizou na sexta posición.
A xogadora granadina, de 25 anos, suma xa certa experiencia na segunda categoría, polo que está máis que preparada para dar o salto á liga Guerreras Iberdrola. Farao con 98 goles no seu haber este curso -a case cinco por partido-.
Coa chegada da nazarí, o Mecalia Atlético Guardés recupera a figura dunha xogadora zurda para a primeira liña, algo do que non gozou na recentemente finalizada tempada. Como é normal, Itziar Martínez adoita partir desde o lateral dereito, ten bos fundamentos ofensivos e un máis que interesante lanzamento desde media distancia. Ademais, conta cunhas capacidades físicas importantes, que lle permiten achegar en calquera sistema defensivo e correr o contraataque se é necesario. Pero, sobre todo, posúe unha ampla marxe de mellora e unha fame competitiva que permiten pensar nunha gran progresión na súa estrea na máxima categoría.
Itziar Martínez: “É un soño para min poder competir ao máximo nivel cun club desta categoría”
Itziar Martínez confesa, con moita alegría, a satisfacción que lle produce incorporarse ao proxecto do Mecalia Atlético Guardés. “Cando me chegou esta oportunidade, non dubidei nin un segundo en aceptala”, recoñece. “É un soño para min poder competir ao máximo nivel cun club desta categoría e contar cunha das mellores afeccións de España”, subliña a granadina Itziar Martínez, “moi contenta” por afrontar este “reto tan ilusionante” para ela.
“E máis, cun equipo como o Guardés, que quere loitar por todo”, apostila Itziar Martínez, que conclúe: “Estou con moitísimas ganas de empezar e de axudar ao máximo ao equipo e gozar a lume de biqueira”.
