O Maristas Coruña roza a permanencia na LF2 a falta de catro xornadas para que finalice a competición regular. A parte baixa da Liga Feminina 2 está moi rifada, e cada dous puntos en xogo poden ser determinantes. Os seguintes disputaranse co Osés Construcción Ardoi, o sábado 6, ás 18:30 horas.
O rival das coruñesas nesta xornada tivo dous compromisos a fin de semana pasada, sendo un deles contra o BAXI Ferrol, ao que case lle arrebatan a vitoria. As ferrolás mantivéronse invictas, e así o Osés Construcción Ardoi segue na segunda posición da LF2, con 18 trunfos e só catro derrotas.
Desta forma, a súa participación na fase de ascenso non está certificada, polo que será un duro competidor nesta xornada para o Maristas Coruña.
O Maristas chega na décima posición
Pola súa parte, as herculinas ocupan actualmente a décima posición na táboa clasificatoria, sendo xunto co CB Arxil o candidato favorito para evitar o descenso. Ambos conxuntos galegos teñen ao colista a tres puntos, pero quedando oito en xogo, nada está decidido na competición.
Ademais, as xogadoras que adestra Jorge Carreira chegan en bo momento, despois dunha vitoria fundamental contra o rival directo ADBA (Agrupación Deportiva Baloncesto Avilés). Neste duelo as coruñesas noquearon ao rival no primeiro cuarto, aproveitando a vantaxe conseguida para lograr a vitoria final.
As galegas perderon na ida
Para esta 23ª xornada, o contrincante é moi distinto. O Osés Construcción Ardoi é un dos conxuntos máis fortes da categoría e é permanente na parte superior da táboa grazas a vitorias como a que logrou ante o propio Maristas Coruña na ida.
A décima xornada enfrontou a galegas e navarras coas primeiras como locais e un resultado no que as visitantes case dobra a anotación coruñesa. O resultado final foi dun 46-83, nun partido no que o Maristas Coruña só foi competidor no segundo cuarto.
Naquela ocasión Andrea Pérez foi a xogadora máis destacada, con once créditos valorativos e trece puntos. A baloncestista é a xogadora mellor valorada das filas vermellas no que vai de tempada, con 320 puntos de valoración acumulados.
Pérez formará parte do plantel que viaxa a Navarra, onde tamén estará a súa compañeira Joana Pereira. A portuguesa está a ser unha das xogadoras máis destacadas das últimas citas das coruñesas, e actualmente acumula 284 puntos anotados na tempada.
No bando do Osés Construcción Ardoi, as miradas apuntarán a Amaya Gastaminza, a súa máxima anotadora e mellor valorada, ou a María Cabrera, quen a segue en valoración. Ayela é dúbida para esta convocatoria, xa que non competiu no último partido das navarras.
O partido deste sábado na Liga Feminina 2 celebrarase coa asistencia de público pero, coma de costume, poderá seguirse vía streaming no Canal FEB.
