Unha vitoria importantísima a pasada fin de semana déulle forza ao Maristas Coruña para achegarse á permanencia. Unhas boas sensacións que deberán manter esta semana ante un rival moi complicado, o Extremadura Miralvalle Plasencia, recentemente ascendido, pero entre os mellores da categoría. A cita será o domingo, 24 de xaneiro, ás 18:30 horas en Plasencia.
Non sen traballo e esforzo, as herculinas do Maristas sitúanse case na metade da táboa da Liga Feminina 2. Con cinco vitorias e once derrotas, as coruñesas teñen 21 puntos que as deixan na novena posición.
O Maristas, un paso máis preto da permanencia
O seu posto é todo un éxito, tendo en conta que son o equipo que máis canastras recibe dos rivais. O cadro que adestra Jorge Carreira acumula 1.176 puntos en contra, sendo o peor equipo defensivo neste sentido da categoría.
Pero isto non frea ás vermellas, que no que vai de tempada lograron algunhas vitorias valiosísimas ante rivais directos, como foi o caso a pasada xornada contra a AD Cortegada. Dous puntos que as alonxan da zona baixa e as sitúan a sete das terceiras clasificadas.
Ser o terceiro equipo con peor valoración media da LF2 non acaba coa ilusión do plantel do Maristas Coruña, que afronta con decisión este novo encontro de liga.
Enfronte, un recentemente ascendido entre os grandes
O seu rival, o Extremadura Miralvalle Plasencia, está a dar a sorpresa neste curso 20/21. As extremeñas son novatas na categoría de prata, pero iso non impide que sexan un dos mellores equipos da competición.
Con once vitorias e cinco derrotas, á inversa que o Maristas, as xogadoras do Miralvalle ocupan a quinta posición, a cinco puntos do primeiro clasificado, o BAXI Ferrol.
Precisamente, o seu último partido foi contra as todopoderosas ferrolás, que lograron unha vitoria moi contundente contra as novatas, afianzando aínda máis o seu liderado.
Con esta derrota, as extremeñas acumulan dúas seguidas. Unha racha que buscarán rematar ante as coruñesas nesta décimo sétima xornada. Para logralo, entre as súas filas teñen a baloncestistas moi completas como Princess Aghayere, a segunda mellor valorada da LF2, ou Stacia Anne Robertson, tres postos por debaixo.
Nas filas galegas, destacan Joana Cristina Pereira, que acadou 25 créditos valorativos na última cita, con 29 tantos (un punto por cada minuto xogado). Ás ordes de Carreira tamén estará Andrea Pérez, segunda máxima anotadora do duelo ante o Cortegada e a mellor valorada do equipo esta tempada, cunha media de 12,81 créditos.
