O gran xogo na última xornada das baloncestistas do Maristas Coruña non tivo recompensa. As galegas lograron poñer contra as cordas ao Azkoitia Azpeitia ISB, un dos mellores equipos da Liga Feminina 2, pero a vitoria escapóuselles nos intres finais (70-65).
Case dez puntos separan a vascas e galegas na clasificación, pero á hora da verdade, a superioridade das primeiras demostrouse só nos últimos cinco minutos do partido.
O Maristas faise forte ante os grandes, sen sumar para afianzar a permanencia
As galegas dirixidas por Jorge Carreira non teñen problemas en tratar de ti a ti a equipos con máis puntos nesta tempada, pero as boas sensacións non se materializan en vitorias.
Este encontro contra o Azkoitia Azpeitia seguiu un discurso similar aos disputados co Adareva e Miralvalle. Nesta ocasión, as locais comezaron dominando pola mínima o partido. Pero o liderato sobre a pista foi cambiando de mans constantemente ao longo da cita.
Se o primeiro cuarto foi para as vascas, o segundo caeu para as galegas, que chegaban ao descanso gañando por dous puntos. Aínda quedaba partido por diante e o Maristas non baixou o ritmo en ningún instante.
Porén, o Azkoitia tirou do seu talento internacional para facerse co control da segunda metade. Green e Effa destacaron pola súa efectividade baixo o aro e non deixaban de sumar puntos para o casilleiro local. No bando contrario, Andrea Pérez e Joana Ferreira apretaban e presionaban, tamén con acerto cara a canastra.
Os esforzos herculinos flaquearon no terceiro cuarto, dando a vitoria momentánea ás vascas. Faltaban dez minutos para que soase a bocina e as locais gañaban de dúas canastras.
Pola súa parte, o Maristas non baixaba os brazos ante a derrota e logrou poñerse por diante outra vez a escasos minutos do final. Pero pouco durou a alegría para as galegas, xa que o cadro de Lazkano deu os golpes finais que remataron por sentenciar o partido ao seu favor.
En pouco máis dun mes rematará a competición regular nesta categoría e, polo de agora, o Maristas ten pé e medio na loita pola permanencia. Malia levar a peor racha de derrotas da categoría, con tres consecutivas, as de Carreira están a cinco puntos das colistas e un das antepenúltimas e empatadas coas décimas e novenas clasificadas.
FICHA TÉCNICA:
70) AZKOITIA AZPEITIA: Lizarazu (5), Effa (23), Sanjuán (-), Morgan (24), Primm (11) -cinco inicial-. Tamén xogaron: Iparragirre (7), Altzaga (-), Otaegi (-) e Lizundia (-).
65) MARISTAS CORUÑA: Pereira (19), Laura Martínez (5), Casal (2), Filgueira (13), Cervelo (2) -cinco inicial-. Tamén xogaron: Cortés (-), Gallán (2), Andrea Pérez (19) e Hughes (3).
PARCIAIS: 15-12, 12-17, 22-16 e 21-20.
ÁRBITROS: Gorka García e Manuel Berbeira.
INCIDENCIAS: Partido da 19ª xornada da Liga Feminina 2 disputado no polideportivo de Azkoitia (Guipúzcoa).
