O Maristas Coruña necesitaba unha vitoria moral e deportivamente, e atopouna xogando en casa ante o Ausarta Barakaldo. As herculinas foron capaces de eliminar a distancia que amosa a táboa clasificatoria na pista e cun gran cuarto final impúxose ás vascas (72-69).
As galegas chegaban a este encontro como o equipo cunha peor racha de derrotas. Tres partidos perdidos de maneira consecutiva e dunha forma dolorosa: nos últimos minutos.
Pero desta vez, o equipo adestrado por Jorge Carreira foi quen de darlle a volta a esta narrativa e ser elas as protagonistas da xesta da vitoria nos intres finais dun duelo.
Tras este trunfo, logrando ante o entón sétimo clasificado, o Maristas Coruña pasa da undécima á novena plaza, nun momento da tempada onde cada vitoria vólvese máis trascendental. A parte baixa da clasificación é unha loita constante e igualada, cunha diferenza de só unha vitoria entre o penúltimo (o CB Arxil) e o noveno clasificado, o propio Maristas Coruña.
O Maristas foi quen de manter o pulso ao Barakaldo
Antes desta vixésima xornada de Liga Feminina 2 as coruñesas tiñan o reto de enfrontarse a un rival cun balance entre vitorias e derrotas de nove das primeiras e dez das segundas. Unhas cifras afastadas das galegas, que levaban cinco vitorias fronte a 14 derrotas.
Porén, desde os primeiros minutos de partido o Maristas Coruña demostrou na súa cancha do que son capaces e a traxectoria ascendente na que están. Os últimos duelos perdidos non remataron con eses resultados pola falta de calidade galega, senón pola súa falta de definición nos minutos finais.
Un discurso que as de Jorge Carreira non estaban dispostas a permitir. Desta forma, o primeiro cuarto rematou cun igualadísimo 15-15, nun partido no que ambos equipos aproveitaban as escasas ocasións que lles deixaban as contrarias.
Para o segundo parcial, a tónica foi moi similar, favorecendo lixeiramente ás locais, que chegaron ao descanso cun punto de vantaxe. O trunfo estaba lonxe de ser consolidado e as visitantes tiñan moitas papeletas para a remontada.
Pero no terceiro cuarto os dous conxuntos fixeron gala da súa concentración no xogo e non cederon facilmente. Os tiros de campo do Barakaldo tiñan resposta nos coruñeses, nunha área na que tamén empataron en canto á efectividade (38%).
Igualdade até o último cuarto do partido
O pulso galego – vasco volveu poñer o empate no marcador, cun 23-23 que mantiña a mínima superioridade galega dun punto a falta de dez minutos para a conclusión do choque.
Chegadas xa ao último tempo do partido, o Maristas Coruña deu un golpe na mesa e plantoulle cara ao Barakaldo. Cansas de non ser capaces de distanciarse do rival, e confiantes no seu xogo, as herculinas por fin deron coa clave para impoñerse ao seu rival desta xornada vixéxima da LF2.
As galegas amosáronse sobre a pista herculina superiores nos tiros desde a liña de tres (acadando unha porcentaxe de 33% fronte ao 18% vasco). Foi deste xeito que as locais consegueron aumentar a súa renda respecto ás visitantes e, por fin, cun cuarto 22-15, o Maristas Coruña reencontrouse cunha traballada e merecida vitoria .
FICHA TÉCNICA:
72) MARISTAS CORUÑA: Laura Martínez (4), Casal (8), Filgueira (9), Cervelo (6) e Andrea Pérez (14) – quinteto inicial -. Tamén xogaron: Pereira (26), Feijoo (3), Cortés (2) e Hughes (-).
64) HGB AUSARTA BARAKALDO: Romero (8), Martín (10), Karamovic (13), Lo Sylla (4) e Chahrour (12) – quinteto inicial -. Tamén xogaron: Vergara (-), Ortega (-), Lewis (4), Torres (-) e Murugarren (13).
PARCIAIS: 15-15, 12-11, 23-23 e 22-15.
ÁRBITROS: Alonso Diez e Trasancos Blanco.
INCIDENCIAS: Partido da 20 ª xornada da Liga Feminina 2 disputado no Colexio Maristas na cidade da Coruña). O encontro celebrouse sen público nas bancadas debido ás restricións decretadas polo goberno autonómico galego por mor da pandemia de COVID-19 coa intención de frear a curva de contaxios do virus.
