O Maristas Coruña despedirase da súa pista esta tempada cun partido ante o GDKO Ibaizabal. Un rival de media táboa, co que competirá este sábado, 20 de marzo, ás 19:00 horas.
Coa permanencia a un paso de distancia, as coruñesas deberán facerse fortes en casa. Sumar os dous puntos podería supoñer unha tempada máis competindo na Liga Feminina 2. Esta fin de semana preséntase como unha boa ocasión para acadalo, sobre todo tendo en conta a dificultade da última xornada, ante o Celta Zorka Recalvi.
A falta de dúas xornadas, as xogadoras de Jorge Carreira ocupan a décima posición, catro postos por riba das colistas, a ADBA, pero só dous puntos por riba delas. Por iso, vencer ao Ibaizabal é o obxectivo principal nas filas coruñesas.
As vascas chegan dunha rifada vitoria ante o Vega Lagunera Adareva Tenerife na anterior xornada, tras repoñerse dun mal inicio de partido. Antes deste trunfo, o Ibaizabal acumulaba catro xornadas consecutivas sen coñecer a vitoria, sendo o seu último partido perdido ante o BAXI Ferrol.
Este foi precisamente o último rival das coruñesas, que tamén caeron derrotadas ante as raíñas do Grupo A da LF2. Malia a cara plantada polas herculinas ao longo do partido, as ferrolás impuxéronse como é costume e controlaron todo o encontro.
Derrota do Maristas na ida
De maneira contraria ao sucedido na primeira volta, o Maristas Coruña deberá dárlle a volta ao resultado obtido na 12ª xornada.
Neste primeiro enfrontamento, o Ibaizabal saíu campión por un 78-45, ante un Maristas Coruña que saíu desinflado á pista vasca e xogou sen ideas ata o último cuarto, cando a reacción xa chegou demasiado tarde.
O acerto de xogadoras como Cervelo e Filgueira nas filas galegas, sumando entre ambas 20 créditos de valoración, non foi suficiente para contrarrestar a Tulonen no bando rival, con 30 puntos valorativos en solitario.
