“Coñecida a composición do grupo A da Liga Feminina 2 para a tempada 21/22, co equipo inscrito e praza confirmada por parte da FEB, o Club Maristas plantéxase a súa participación en categoría profesional para a próxima tempada”. Así comeza un escrito difundido en redes polo propio club explicando a necesidade dun patrocinador para facer fronte aos gastos da categoría.
As coruñesas competirán, se a economía o permite, con outros equipos galegos como o Ulla Oil Rosalía, o Mariscos Antón Cortegada ou o CB Arxil, quen tamén emitiu un comunicado manifestando o seu descontento pola configuración do grupo A.
O grupo complétase con catro andaluces (Asisa CB Alhaurín De La Torre, Unicaja de Málaga, Córdoba Baloncesto Femenino e Ingenia Solar Energy de Almería), dous canarios (Magec Tías de Lanzarote e Adareva de Tenerife), dous vascos (Barakaldo e GDKO Ibaizabal), o BF León e o desprazamento máis complicado, o Melilla Sport Capital La Salle.
O Maristas sinala como, con estes rivais, deberá realizar 13 viaxes, sete dos cales (como mínimo) serán en avión, pasando a noite fóra, e sumarán máis de 12.000 quilómetros en total, sumando horas en autobús e vóos.
O Maristas fai un chamamento ás empresas
O club colexial, lonxe de poder profesionalizar ás súas xogadoras, que deben compaxinar adestramentos e partidos con estudos e traballo, precisa axuda económica para seguir adiante.
Segundo explican desde o propio equipo, “unha gran parte do corto orzamento do club debe ser dirixido a afrontar os custos de desprazamento. Os esforzos por parte da directiva están encamiñados a dar continuidade ao proxecto e non deixar escapar esta oportunidade que tantos anos custou conseguir, que as mozas da nosa cidade poidan seguir desenvolvendo a súa actividade nunha liga semiprofesional”.
O Maristas non conta cun patrocinador desde hai moito tempo, pero nestes momentos é algo “basico e necesario” para manter ao conxunto na Liga Feminina 2.
Desde as súas redes, as coruñesas fan un chamamento ás empresas “que pasaron e superaron esta crise, que se reinventaron, que compartan os nosos mesmos valores, apostando pola xente de casa, as nosas xogadoras e os nosos equipos de base, que con moito esforzo e superación chegamos a conseguir un soño inalcanzable”. O apoio económico vólvese vital, nunha liga cada vez máis costosa, e tras unha pandemia que non deixa de poñer trabas.
