O Maristas Coruña precisaba unha vitoria e perdeuna nos minutos finais. O pulso co Vega Lagunera Adareva Tenerife comezou de maneira favorable para as herculinas e mantívose nun ti a ti nos minutos seguintes, ata que as visitantes deron un golpe na mesa no último cuarto, levándose o trunfo (66-69).
Nos últimos partidos as herculinas dirixidas por Jorge Carreira demostraron estar á altura de rivais superiores na táboa da LF2 como no duelo contra o Miralvalle. Este partido chegou despois de dúas vitorias ante as galegas da AD Cortegada e Ulla Oil Rosalía, pero unha derrota co Arxil.
A sorte non acompaña ao Maristas Coruña
De novo, a mala sorte castigou duramente ao conxunto herculino do Maristas. O encontro comezou cun man a man entre ambos conxuntos, pero coas locais dominando lixeiramente na súa pista. Os primeiros puntos foron para elas, cun parcial 8-0 que non tardaron en igualar as canarias. Un vaivén de puntos, que situaba o marcador a un 17-16 pasados os 10 primeiros minutos.
A tónica da igualdade continuou no segundo cuarto, con accións favorables para ambos equipos, só que desta vez a inciativa estaba no bando do Vega Lagunera Adareva Tenerife. As visitantes lograban irse de catro puntos a falta de escasos 19 segundos para o descanso, polo que Jorge Carreira solicitou un tempo morto.
O adestrador coruñés reorganizou ás súas pupilas, logrando rascar uns puntos ao borde do parón, deixando o electrónico nun igualado 33-35 no ecuador da cita.
Pasado o descanso, as canarias mantiñan a súa lixeirísima vantaxe, xa que cada canastra súa tiña resposta no xogo local. Seguiron apretando as herculinas do Maristas Coruña ata que conseguiron colocarse de novo por diante no luminoso, pero sen tempo para respirar, cunha vantaxe dun punto.
Arranque do último cuarto case á par 49-48
Así chegaba o cuarto final do partido, cun 49-48 no electrónico e o partido por decidir. Nos primeiros minutos do último tempo, Dembélé e Ibáñez adiantában ás visitantes por tres puntos, pero Andrea Pérez e Joana Ferreira tiñan aínda moito que dicir no bando local.
De novo, desequilibrouse a balanza a favor do Vega Lagunera Adareva Tenerife, grazas ás canastras de Ibáñez. O Maristas seguía presionando e igualando o resultado, ata a xogada final.
No último minuto do cruce entre coruñesas e tinerfeñas, un triple de Tati Casal que podería ter dado a vitoria ás locais saíu do aro. A falta de medio minuto, as coruñesas perdían de tres, pero unha falta sinalada á base local deulle dous tiros ás canarias, que non fallaron. Non se rendían as galegas, que volveron a colocarse a tres puntos.
Á desesperada, Andrea Pérez intentou a imposible tirando desde o medio do campo, buscando forzar o tempo extra. O tiro non entrou no aro, e o Adareva levouse o duelo.
Desta forma, as canarias do Vega Lagunera Adareva Tenerife volven a casa coa novena vitoria baixo o brazo e ocupando a oitava posición. Pola contra, o Maristas Coruña queda na undécima, con 23 puntos, a catro do colista.
Enhorabuena por la victoria y buen viaje de vuelta!!!
Que tengáis un buen final de temporada. A seguir cuidándose https://t.co/FfhMScChhB— Club Maristas Coruña (@MaristasCoruna) January 30, 2021
FICHA TÉCNICA:
66) MARISTAS CORUÑA: Tati Casal (-), Laura Martínez (6), Eugenia Filgueira (8), Andrea Pérez (24) e Laura Cervelo (6) – quinteto inicial – Tamén xogaron: Joana Ferreira (12), Marina Feijóo (-), Lucía Galán (2), Mara Cortés (8), Laura Ruíz (-), Sara Bastos (-) e Laura Hughes (-).
69) VEGA LAGUNERA ADAREVA TENERIFE: Alima Dembele (15), Sendy Basaez (12), María Luque (16), Laura Ilunga (7) e Ainhoa Negrín (-) -quinteto inicial -. Tamén xogaron: Noelia Ibañez (16), Alessia Contino (-), Deborah Luque (-) e Claudia Reynes (3).
PARCIAIS: 17-16, 16-19, 16-13 e 17-21.
ÁRBITROS: Adrían Álvarez e Christian Abalo.
INCIDENCIAS: Partido da 18ª xornada da Liga Feminina 2 disputado no Colexio Maristas (A Coruña).
