O Maristas perdeu a oportunidade de dar a sorpresa ao Miralvalle (72-65)

Case da o Maristas Coruña a sorpresa da xornada, nun partido que se lle escapou na segunda metade. As coruñesas non puideron co Extremadura Miralvalle Plasencia, novato na Liga Feminina 2, pero na parte alta da clasificación (72-65).

A ida foi para as galegas, que se impuxeron no cuarto final ás extremeñas, pero a volta tivo un desenlace distinto. Unha primeira parte dominada polo Maristas non foi suficiente vantaxe para a vitoria.

O Maristas non puido co ‘revelación’

O Miralvalle está a ser o equipo revelación da tempada e en cada partido demostra o por qué. A inexperiencia na categoría de prata compénsase co bo nivel das súas xogadoras, que non dan un partido por perdido. Tampouco o deron ante as coruñesas do Maristas, que non foron quen de afianzar a vitoria.

A dous puntos por minuto comezaron as de Jorge Carreira o partido. Un primeiro cuarto con acerto en ataque que se vía contestado polas canastras das extremeñas.

Así chegaba o segundo cuarto, cunha lixeira vantaxe para as galegas dun punto. Ambos equipos seguían mantendo un man a man, con maior acerto do lado visitante. As galegas tamén melloraron a súa defensa, de maneira que as locais tiveron máis problemas para chegar ao aro.

Vantaxe galega de catro puntos ao descanso

Coa chegada do descanso, o partido estaba en mans do Maristas, que gañaban de catro puntos. Pero todo cambiou no terceiro tempo. As coruñesas non lograron aguantar o ritmo e o Miralvalle aproveitou os erros rivais. Cun parcial 24-15 as extremeñas disipaban as esperanzas das galegas de levarse a vitoria.

O último tempo comezaba cunha vantaxe de cinco puntos para as locais. Un resultado aínda aberto e co que as herculinas poderían ter logrado a remontada. O cadro local apretaba e aumentaba a distancia, aínda que as galegas non baixaban os brazos en ningún momento.

Finalmente, o sexto trunfo non puido ser e as extremeñas suben á cuarta posición, con só cinco derrotas (unha delas ante as coruñesas na primeira volta). Pola súa parte, o Maristas queda na novena posición, no limbo entre o descenso e a permanencia.

Joana Pereira segue liderando o Maristas

A xogadora lusa Joana Cristina Pereira repetiu como a baloncestista mellor valorada das filas coruñesas. Con 18 créditos valorativos, Pereira foi a máxima anotadora do club galego ao que aportou tamén tres rebotes e catro asistencias.

Por detrás dela estiveron Laura Hughes e Andrea Pérez, con 16 e 12 puntos de valoración respectivamente. No bando contrario, destacou Robertson, MVP do encontro con 32 puntos valorativos.