O Maristas non pode co segundo mellor equipo da LF2 (46-83)

Esta tempada a Liga Feminina 2 está moi igualada tanto na súa parte superior, onde os equipos se xogan competir o ascenso, como na inferior, onde os clasificados loitan por non descender. Esta 23ª xornada trouxo un duelo entre estas ambas partes, materializada no encontro Osés Construcción Ardoi – Maristas Coruña, cunha vitoria para as locais (69-54), que pon en perigo a salvación galega.

Con esta derrota, as coruñesas mantense como décimas na categoría, a catro postos das colistas, pero só a dous puntos de distancia, ou dito doutra forma, dúas vitorias. Por iso, malia que hai outros favoritos para o descenso, aínda quedan tres xornadas nas que se pode poñer en perigo a salvación vermella.

O Ardoi dominou o partido desde o inicio

O Maristas Coruña sabía que visitaba a un rival forte, entre os de máis nivel da categoría. As navarras ocupan a segunda posición desde a undécima xornada, e con 42 puntos logran xa o pase matemático á fase de ascenso.

Osés Construcción Ardoi - Maristas Coruña / FNB ARDOI — Osés Construcción Ardoi – Maristas Coruña / FNB ARDOI

O Ardoi xogábase en casa este ansiado pase, e deixou claro desde o primeiro momento que ía loitar por el. Así, os primeiros puntos sumáronse ao casilleiro local, co seu xogo rápido e férrea defensa. As galegas intentaban que as rivais non se desmarcasen, pero os seus ataques eran respondidos con tiros de campo polas navarras. Así, o primeiro cuarto xa amosaba a diferenza na cancha (23-13).

Para o segundo tempo o guion mantívose igual, cun Maristas loitador que non alcanzaba o empate, pero mantiña ás locais a uns dez puntos de distancia. Cunha clara melloría respecto ao primeiro cuarto, o equipo de Carreira mantiña a raia as ofensivas das contrincantes, pero non era superior baixo o aro. O segundo parcial rematou nun igualado 15-14, que deixaba o marcador ao descanso no 38-27.

O partido estaba encamiñado cara a vitoria do Ardoi, pero o Maristas tiña as súas opcións aínda abertas, coa metade do encontro por diante.

Porén, as locais saltaron á pista con forza tras o descanso. As azuis aumentaban a súa renda ata os 20 puntos de vantaxe grazas ao poderío de Irantxu Etxevarría e Eva Cases. Lideradas por Joana Pereira (a portuguesa sería a mellor das galegas, con 10 créditos de valoración) no bando visitante, as coruñesas seguían intentando forzar un empate cada vez máis afastado. A falta de dez minutos para o final, as locais xa gañaban de 18 puntos.

Desta forma, o último cuarto chegou con tranquilidade no banco anfitrión e case sen esperanzas no visitante. Malia unha gran actuación do Maristas neste tempo final, sendo o primeiro parcial no que superarían ás navarras, a reacción chegou demasiado tarde e non foi o suficientemente contundente. O 14-17 deixaba o electrónico no 69-54 final, que asegura un pase á fase de ascenso do Ardoi, como xa lograron as galegas do BAXI Ferrol e Celta Zorka Recalvi.

A permanencia do Maristas periga

Con esta derrota as opcións de salvarse no Maristas Coruña perigan. As herculinas polo de agora aínda poden respirar tranquilas. Cun colchón de dúas vitorias sobre as colistas do Grupo A, o único equipo que descenderá desta clasificación, dan motivos para a esperanza, pero a tempada aínda non rematou.

As galegas teñen por diante tres novos retos, e nada fáciles de competir. O seguinte partido será ante as invictas do BAXI Ferrol, no derbi das Rías Altas. Para a seguinte xornada, o Maristas recibe ao Ibaizabal, actualmente sétimo clasificado. Rematando a competición regular, as herculinas pechan a tempada cun derbi A Coruña – Vigo, xogando contra o Celta Zorka Recalvi.

As imaxes do Ardoi – Maristas

1 de 21

- +

Osés Construcción Ardoi - Mariss Coruña / FNB ARDOIQOsés Construcción Ardoi - Maristas Coruña / FNB ARDOI