Cinco xornadas e cinco finais é o que terá que superar o Maristas Coruña para manterse na Liga Feminina 2. A súa salvación non está asegurada, polo que deberán superar o primeiro asalto, ante un rival directo, a ADBA (Agrupación Deportiva Baloncesto Avilés). A cita será o sábado, 27 de febreiro, ás 19:00 horas.
No Grupo A da Liga Feminina 2, no que se enmarcan os conxuntos galegos, os postos finais están moi competidos. Nesta categoría descende o peor de cada grupo e o peor penúltimo de toda a competición, que previsiblemente será o Sevilla do grupo B. As espadas están en todo o alto na loita por conservar un sitio na LF2 o vindeiro curso.
Por iso, as coruñesas do Maristas deben preocuparse moito por non quedar colistas na súa clasificación. Polo de agora, xunto coas tamén galegas do Club Baloncesto Arxil, son o equipo en mellor posición para evitar este posto, pero nada está decidido. Con 27 puntos no seu casilleiro, o Maristas Coruña ocupa agora mesmo a décima posición na táboa clasificatoria, empatando coas pontevedresas, e cun punto máis que A D Cortegada, Ulla Oil Rosalía e o seu rival esta xornada, ADBA. O colista, o conxunto grancanario do Magec Tías, ten só 24 puntos.
Joana Pereira é unha peza clave no conxunto vermello
O xogo do Maristas Coruña debe pasar por buscar unha e outra vez a unha das súas xogadoras estrelas: Joana Pereira. A deportista lusa ten unha media de 12.95 puntos por partido e é a máxima anotadora do seu club desde a liña de tiro libre, cun promedio dun 80% de acerto.
Ademais, nos últimos encontros, malia non atopar a vitoria na maior parte das ocasións, Joana Pereira foi fundamental nos acertos galegos. A portuguesa do equipo galego foi a MVP do seu equipo nos dous últimos encontros disputados.
Nesta fin de semana, como xa pasou na anterior, a xogadora do Maristas Coruña enfrontarase a un dos seus ex equipos. Xa o fixo ante o Magec Tias a pasada semana, e agora o fará ante a Agrupación Deportiva Baloncesto Avilés no que competiu na tempada 17 / 18. Aquel curso a xogadora rematou cunha media de 7,8 puntos por partido, algo menos que a media que leva actualmente, que se sitúa nos 13 puntos.
O Maristas Coruña perdeu o primeiro enfrontamento
Desta forma, vencer ante as asturianas é un paso vital no camiño cara a permanencia para as herculinas. Porén, non será nada sinxelo.
Máis aló da igualdade que mostran os números cando observamos a táboa de clasificación, o certo é que o Maristas Coruña só gañou nunha ocasión máis que as visitantes. Mirando cara atrás, no anterior enfrontamento que tiveron entre si galegas e asturianas, o gañador foi a Agrupación Deportiva Baloncesto Avilés.
Naquela primeira volta, as asturianas leváronse os dous puntos cun resultado 60-49, que lles permitiu saír da mala racha que as mantiña na oitava xornada como o equipo con máis derrotas consecutivas.
No bando coruñés, este partido perdido marcou o inicio dunha caída en picado. Antes deste partido, o Maristas Coruña ocupaba a oitava posición. Con esta derrota chegaron tres máis, que deixaban ás galegas na 13ª posición na xornada 12. Foi un punto de inflexión negativo na súa traxectoria nesta campaña 2020 – 2021.
Desta vez, non hai tempo para a reacción. Os seguintes rivais das herculinas son todos de alto nivel: Construcciones Ardoi, BAXI Ferrol, GDKO Ibaizabal e Celta Zorca Recalvi, así que perder ante a ADBA (Agrupación Deportiva Baloncesto Avilés) non é unha opción nas filas vermellas.
Para este partido, no plantel de Jorge Carreira son dúbida as seguintes xogadoras: Laura Cervelo, Laura Hughes e Eugenia, pero estarán á súa disposición o resto de deportistas da plantilla herculina.
