Unha das claves para crecer na clasificación é vencer aos rivais directos. No Maristas Coruña sábeno ben, e por iso preparan a conciencia o partido deste sábado, 30 de xaneiro, ás 19:00 horas, que as enfrontará ao Vega Lagunera Adareva Tenerife.
A un posto de distancia, só tres puntos separan a galegas e canarias na Liga Feminina 2. As primeiras ocupan a novena posición, con 22 puntos no seu haber, mentres que as segundas están colocadas na oitava praza, con 25 puntos no seu casilleiro.
Traxectorias parellas
Malia a súa situación na metade da táboa, aínda queda moita tempada de LF2 por diante, e esta categoría de prata é moi competida. A diferenza entre o colista e o terceiro clasificado é de só 12 puntos, e as coruñesas do Maristas están a catro do farolillo vermello.
Sen dúbida, este será un duelo moi igualado sobre a cancha. Nesta cita, ambos equipos medirán forzas para demostran quen é o mellor. Con estatísticas moi parellas, atendendo ás cifras o Adareva é algo superior, sobre todo nos tiros de campo e nas valoracións. Pola súa parte, as galegas do Maristas Coruña destacan desde a liña de tres e son algo mellores desde o tiro libre.
Ademais, ambos conxuntos veñen de colleitar unha derrota no seu partido previo. Polo que as ansias de vitoria, serán maiores. No caso do Maristas, as xogadoras non foron capaces de dominar ao Extremadura Miralvalle Plasencia. O acerto da primeira metade non foi suficiente para aguantar a vantaxe e na segunda parte as extremeñas fixéronse co trunfo.
Pola súa banda, o Adareva ven de perder contra un imparable BAXI Ferrol, nun encontro no que morreu loitando. O Vega Lagunera foi o primeiro equipo capaz de poñer en apuros as ferrolás. De feito, as canarias lograron vencer ás invictas ferrolás ao tempo de descanso, forzando ás de Lino López a dalo todo na segunda parte para non deixar escapar a vitoria. A piques estiveron de dar a badalada e ser as que puxeran fin a unha serie de 17 vitorias consecutivas das galegas da cidade departamenta.
Esta excelente actuación ante o mellor equipo da LF2 demostra que o Maristas Coruña deberá facer un gran esforzo para vencer ás amarelas.
#LF2
Seguimos trabajando, preparando el partido de este sábado, una vez superados los test, ya estamos listas para luchar por nuestros objetivos@SomosABANCA @Deportegalego @FundEmalcsa @ConcelloCoruna @fdeportegal @Xunta @FGB_Baloncesto @coruna_deportes #NON #Maristas pic.twitter.com/voP2QGHMwo— Club Maristas Coruña (@MaristasCoruna) January 29, 2021
O Maristas xa coñece a clave para vencer ao Adareva
Esta non será a primeira vez nesta tempada na que galegas e canarias se enfronten na pista. Xa o fixeron na primeira volta, cun resultado favorecedor para o Maristas.
Aquel 1 de novembro as coruñesas dirixidas por Jorge Carreira lograron a que foi a súa segunda vitoria do curso na súa primeira saída de Galicia. O partido xa deu mostra da igualadade no nivel dos dous clubs, nun encontro que tivo que decidirse na prórroga.
Corenta minutos non foron entón suficientes para decidir ao gañador, xa que á fin do duelo o electrónico marcaba o empate a 56. Lonxe de deixar que o cansancio as vencera, as galegas deron mostra do seu compromiso e loitaron pola vitoria no tempo engadido. Un esforzo que tivo recompensa, xa que volveron de terras tinerfeñas con dous puntos baixo o brazo.
Desde entón, o Maristas seguiu entre claros e escuros, provocados por un erro recurrente que aínda teñen pendente de enmendar. As herculinas son o equipo que máis puntos encaixa en cada partido, o que fai que moitos dos seus encontros se convirtan en remontadas.
Un aspecto que deberán corrixir esta xornada, xa que a medida que se achega a fin da tempada gañar, e facelo ante os rivais directos, é cada vez máis importante.
O encontro poderá seguirse vía streaming no Canal FEB.
