No Maristas Coruña sumaron por fin unha vitoria ante un ferido Barakaldo pero confiáronse contra o colista, o Magec Tías, que reencontrouse co trunfo a costa das coruñesas (77-67).
Con dous puntos máis as herculinas dirixidas por Jorge Carreira poderían ter xa medio afianzada a salvación na Liga Feminina 2, pero o resultado do partido ante as canarias muda os seus plans. O pouco acerto fronte ao aro e a incapacidade para competir contra a imparable Regina Gómez, a MVP do duelo, castigaron ás galegas.
O Maristas viuse superado
O conxunto visitante loitou durante os corenta minutos, tendo máis acerto na primeira parte do encontro, cando conseguía colocarse por riba pola mínima. O primeiro tempo rematou cunha vantaxe de dous puntos que lle serviría para ir gañando ao descanso, xa que no segundo cuarto as forzas igualáronse e este parcial rematou en empate.
No xogo do Maristas Coruña destaca a portuguesa Joana Ferreira, sendo a súa máxima anotadora (rematou o encontro con 24 puntos) malia non estar especialmente inspirada en comparación con outros encontros. Un dos seus tiros mereceulle salvar a primeira parte ás galegas. As visitantes víronse obrigadas a remontar un parcial 1-9 en contra, salvado por un triplo e unha canastra de Andrea Pérez e outros dous puntos da portuguesa.
O paso por vestiarios non lle sentou ben ás coruñesas, que saíron completamente desconectadas do partido. Un parcial 12-3 a favor do Magec marcaba xa o que sería un intento de remontada fallido para o plantel de Carreira. Os seus erros en ataque complementábase cunha forte e traballada defensa canaria, facendo que as locais chegaran ao cuarto final cunha vantaxe de sete puntos.
Nos últimos dez minutos un triplo de Joana e unha canastra de Andrea Pérez poñían o empate e un triplo de Tati Casal situábanas por diante, devolvendolle as esperanzas ao Maristas. Con todo, o marcador para as visitantes quedou conxelado aí.
As galegas non volveron a acertar baixo o aro, mentres que non sabían frear a un Magec que sumaba de dous en dous e aproveitou os tres minutos en branco das visitantes para rematar o partido.
Con este resultado final (77-67) o Maristas ocupa a décima posición con 27 puntos e segue metido de cheo na loita pola permanencia. Pola súa parte, o Magec, aínda colista, suma 24 puntos.
FICHA TÉCNICA
77) MAGEC TÍAS CONTRA LA VIOLENCIA DE GÉNERO: Regina Gómez (19), Maimouna Haidara (9), Carolina Mateo (20), Esperanza Delgado (10), Camille Giardina (16) – quinteto inicial -. Tamén xogaron: Sara Duarte (1), Iranzu Drake (2), Samira Olano (-) e Natalia García (-).
67) MARISTAS CORUÑA: Laura Martínez (3), Casal (10), Filgueira (11), Cervelo (6) e Andrea Pérez (11) – quinteto inicial -. Tamén xogaron: Pereira (24), Galán (-), Cortés (2) e Hughes (-).
PARCIAIS: 16-18, 15-15, 27-18 e 19-16.
ÁRBITROS: Gamero Luque e Castro Pulido.
INCIDENCIAS: Partido da 21 ª xornada da Liga Feminina 2 disputado no pavillón municipal de Tías.
