O Maristas Coruña non foi quen de levarse os dous puntos de Vizcaia. As coruñesas perden así o sexto posto que mantiñan na Liga Feminina 2, pasando a ocupar o noveno, con oito puntos dos seis partidos disputados.
Malia dominar o primeiro parcial, que finalizou coa vantaxe para as visitantes cun 16-18, a sorte non acompañou ás galegas para o resto do encontro. O segundo cuarto foi completamente dominado polas vascas, que colleron o mando do partido e marcaron o ritmo do xogo, chegando a un abultado 40-28 ao tempo de descanso.
A segunda parte estivo máis igualada, entre un Maristas e un Barakaldo que viñan cunha traxectoria similar no que vai de competición. Pero a boa actuación de Ijeoma Uchendu, con 23 puntos anotados, decantou o partido do lado local.
Os esforzos das coruñesas, lideradas por Andrea Pérez, autora de 18 puntos, non foi suficiente. O encontro resolveuse cun 72-57 que trunca as aspiracións das galegas.
FICHA TÉCNICA
72) HGB AUSARTA BARAKALDO: Aina Martín (10), Nicole Murugarren (6), Bintou Lo Sylla (4), Ariana Lewis (13), Laura Chahrour (8) -cinco inicial-. Tamén xogaron: Aitana Vergara (-), Eva Ortega (-), Emma Karamovic (7), Bea Torres (1), Ana Ilic (-) e Ijeoma Uchendu (23)
57) MARISTAS: Laura Martínez (2), María Cortés (4), Eugenia Filgueira (6), Laura Cervelo (10), Joana Cristina Pereira (8) – quinteto inicial -. Tamén xogaron: Elena Pedrosa (-), Marina Feijóo (4), Beatriz Sanz (2), Tatiana Casal (3), Ariadna González (-) e Andrea Pérez (18).
PARCIAIS: 16-18, 24-10, 19-14 e 13-15.
ÁRBITROS: Jaime Enrique Álvarez-Ossorio e Samuel Martínez.
INCIDENCIAS: Partido correspondente á sétima xornada da Liga Feminina 2 disputado no polideportivo Lasesarre en Barakaldo (Vizcaia).
