A alcaldesa da Coruña, Inés Rey, e o concelleiro de Deportes, Manuel Vázquez, felicitaron ao club coruñés Marineda Hockey nun acto celebrado no Palacio Municipal de María Pita no que parabenizaron as integrantes do club polos éxitos colleitados neste o seu primeiro ano de vida. Primeiro foi a Copa Princesa e agora o ascenso á máxima categoría do hoquei sobre patíns feminino español: a OK Liga Iberdrola.
O Concello da Coruña recibiu esta tarde no Salón de Sesións do Palacio Municipal de María Pita ao Marineda Hockey tras a histórica tempada asinada polo club coruñés, culminada co ascenso á OK Liga Iberdrola e a conquista da Copa Princesa.
A alcaldesa, Inés Rey, e o concelleiro de Deportes, Manuel Vázquez, encabezaron o acto institucional no que participaron as xogadoras, o corpo técnico e a directiva da entidade.
Durante a recepción interviñeron a capitana do equipo, Alba Garrote; o adestrador, Nelson Obelleiro; e a presidenta da entidade, Beatriz Lema. Posteriormente, a alcaldesa fixo entrega dunha Torre de Hércules de Sargadelos ás capitanas do Marineda Hockey en recoñecemento á histórica tempada asinada polo equipo coruñés.
Ver esta publicación en Instagram
Inés Rey destacou o impacto deportivo e social dun proxecto “que en menos dun ano conseguiu situar á Coruña na elite do hóckey feminino estatal cunha tempada practicamente perfecta”. A alcaldesa puxo en valor “o esforzo, a ambición e a unión dun grupo que representa os mellores valores do deporte e que xa é un referente para moitas nenas e mozos da cidade”.
Ademais do ascenso, o Marineda Hockey acadou a Copa Princesa
O Marineda Hockey logrou o ascenso á OK Liga Iberdrola a falta de dúas xornadas para o remate da competición, tras asinar unha traxectoria extraordinaria con 21 vitorias e 3 empates en 24 partidos, mantendo ademais a condición de invicto. O equipo coruñés certificou o ascenso o pasado domingo no pavillón do Agra I ao vencer por 3-1 ao Raspeig ante unha bancada chea entregada ao equipo.
Coa recepción celebrada esta tarde, o Concello da Coruña recoñeceu publicamente o éxito deportivo dun club nacido hai menos dun ano e que xa conseguiu tamén conquistar a Copa Princesa.
Ver esta publicación en Instagram
